लक्ष्मीपूजनाचा दिवस लोकल प्रवाशांसाठी मनस्तापाचा, भरदिवसा मेगाब्लॉक, जाणून घ्या वेळा…
मुंबई प्रतिनिधी दिवाळीतील रविवार आणि नरक चतुर्दशी, लक्ष्मीपूजनाचा मुहूर्त यांमुळे नातेवाईकांसह आप्तस्वकीयांच्या भेटीगाठीसाठी लोकलने प्रवास करणाऱ्यांना मध्य रेल्वेच्या ढिसाळ नियोजनाचा त्रास सहन करावा लागणार आहे. रेल्वेने छत्रपती शिवाजी महाराज टर्मिनस ते विद्याविहार आणि सीएसएमटी ते चुनाभट्टी/वांद्रेदरम्यान रविवारी दिवसा ब्लॉक घोषित केला आहे. यामुळे मुख्य मार्गावरील धीम्या आणि हार्बर मार्गावरील वाहतूक बंद राहणार आहे.
पश्चिम रेल्वेवर चर्चगेट ते मुंबई सेंट्रलदरम्यान शनिवारी मध्यरात्री १२.१५ ते रविवार पहाटे ४.१५पर्यंत ब्लॉक घोषित करण्यात आला आहे. यामुळे रविवारी दिवसा कोणताही ब्लॉक घेण्यात येणार नाही. दिवाळीत नरक चतुर्दशी आणि लक्ष्मीपूजन एकाच दिवशी आहे. यंदा या मुहूर्ताला रविवारचा दिवस आहे. त्यामुळे नातलग व मित्र-मैत्रिणींच्या भेटीगाठीचा दिवस रविवारच असेल. मात्र हाच मुहूर्त साधून मध्य रेल्वेने ब्लॉकचे नियोजन केले आहे.
सीएसएमटी ते विद्याविहारदरम्यान अप आणि डाऊन धीम्या मार्गावर रविवारी सकाळी १०.५५ ते दुपारी ३.५५ या वेळेत ब्लॉक घेण्यात येणार आहे. या कालावधीत धीम्या मार्गावरील लोकल फेऱ्या जलद मार्गावर वळवण्यात येणार आहेत. यामुळे शेकडो लोकल फेऱ्या रद्द आणि विलंबाने धावणार आहेत. देखभाल-दुरुस्तीसाठी रेल्वे प्रशासनाकडून ब्लॉक घोषित करण्यात येतो. मात्र याचे नियोजन करताना सणासुदीचे भान असणे आवश्यक आहे. पश्चिम रेल्वेने रात्रकालीन ब्लॉक घेतला आहे. मात्र, मध्य रेल्वेच्या ब्लॉकमुळे हार्बर-मुख्य मार्गावरील प्रवाशांना मनस्ताप सहन करावा लागणार आहे.
मध्य रेल्वे
स्थानक : सीएसएमटी ते विद्याविहार
मार्ग : अप आणि डाऊन धीमा
वेळ : सकाळी १०.५५ ते दुपारी ३.५५
परिणाम : धीम्या मार्गावरील लोकल फेऱ्या जलद मार्गावर वळवण्यात येतील. यामुळे काही फेऱ्या रद्द, तर काही फेऱ्या विलंबाने धावणार आहेत.
हार्बर मार्ग
स्थानक : सीएसएमटी ते चुनाभट्टी/वांद्रे
मार्ग : अप आणि डाऊन
वेळ : सकाळी ११.१० ते दुपारी ४.१०
परिणाम : सीएसएमटी/वडाळा रोड ते वाशी/बेलापूर/पनवेलदरम्यान अप-डाऊन आणि सीएसएमटी ते वांद्रे गोरेगावदरम्यान अप-डाऊन लोकल फेऱ्या रद्द राहणार आहे. पनवेल ते कुर्लादरम्यान विशेष फेऱ्या चालवण्यात येणार आहेत.
पश्चिम रेल्वे
स्थानक : चर्चगेट ते मुंबई सेंट्रल
मार्ग : अप आणि डाऊन जलद
वेळ : शनिवारी मध्यरात्री १२.१५ ते रविवार पहाटे ४.१५
परिणाम : रविवारी दिवसा ब्लॉक नाही
