महाराष्ट्र राज्य खादी व ग्रामोद्योग मंडळामार्फत राबविण्यात येणाऱ्या मध केंद्र, मधमाशापालन व अन्य योजनांविषयीच्या जनजागृती शिबिराचे आयोजन

 

 

 

ठाणे, प्रतिनिधी :- महाराष्ट्र राज्य खादी व ग्रामोद्योग मंडळामार्फत कार्यान्वित झालेल्या मध केंद्र योजना, मधमाशापालन योजनेंतर्गत महिला, युवक-युवती, सुशिक्षित बेरोजगार, आदिवासी, ज्येष्ठ नागरीक, अनुसूचित जाती-जमाती, इतर मागास वर्ग, भटक्या विमुक्त जमाती, स्वातंत्र्य सैनिक, स्वयंसेवी संस्था, महिला बचतगट, स्वयंसहाय्यता युवा गट, शेतकरी, शेतमजूर, भूमिहीन पांरपारिक कारागीर इ. समाजातील सर्व घटकांना मध योजनेचा लाभ देण्यात येतो. याशिवाय महाराष्ट्र राज्य खादी व ग्रामोद्योग मंडळामार्फत पंतप्रधान रोजगार निर्मिती कार्यक्रम, मुख्यमंत्री रोजगार निर्मिती कार्यक्रम, प्रधानमंत्री विश्वकर्मा कौशल्य सन्मान योजना इ. योजना राबविण्यात येतात. या योजनेंतर्गत उद्योजकांना विविध उद्योग उभारण्यासाठी आर्थिक सहाय्य देण्यात येते. तसेच अनुदानाचा लाभ देण्यात येतो. मध योजनेंतर्गत लाभ घेऊ इच्छिणाऱ्या व्यक्तींना विनाशुल्क निवासी प्रशिक्षण देण्याची व्यवस्था मंडळामार्फत करण्यात येते.

 

या योजनांची माहिती जास्तीत जास्त लोकांना व्हावी, यासाठी दि. 15 फेब्रुवारी 2024 रोजी एक दिवसीय जनजागृती शिबिराचे आयोजन मु.पो. गणेशपुरी, ता-भिवंडी येथे आयोजित करण्यात आले असून या शिबिराची वेळ सकाळी 10.00 ते संध्याकाळी 5.00 अशी असणार आहे. या शिबिरामध्ये शासनाच्या कृषी विभाग, वन विभाग, पंचायत समित्ती इ. शासकीय कार्यालयाचा सहभाग राहणार आहे. या शिबिरात प्रवेश नि:शुल्क आहे. या विविध शासकीय योजनांचे लाभ घेऊ इच्छिणाऱ्या इच्छुकांची नाव-नोंदणी करुन त्यांचे अर्ज शिबिरामध्ये भरुन घेण्यात येणार आहे.

 

तरी या शिबिरात इच्छुक नागरिकांनी मोठया संख्येने सहभागी व्हावे, असे आवाहन जिल्हा ग्रामोद्योग अधिकारी, महाराष्ट्र राज्य खादी व ग्रामोद्योग मंडळ, ठाणे यांनी केले आहे.

 

0000