सुशासन सप्ताहात ५३०१ लाभार्थ्यांना शासकीय सेवांचा लाभ-९१ शिबीरांचे आयोजन ; ५८९ तक्रार अर्ज निकाली…
बुलढाणा, प्रतिनिधी: केंद्रीय प्रशासकीय सुधारणा आणि सार्वजनिक तक्रारी विभागाच्या निर्देशानुसार जिल्हा प्रशासन मार्फत १९ ते २४ डिसेंबर दरम्यान ‘सुशासन सप्ताह-प्रशासन गॅंाव की ओर’ मोहीम राबविण्यात आली. या मोहिमेंतर्गत जिल्हा प्रशासनाच्या विविध विभागामार्फत ५,३०१ लाभार्थ्यांना विविध शासकीय सेवांचा लाभ देण्यात आला.
या मोहिमेला जनतेचा उत्स्फूर्त प्रतिसाद लाभला असून या मोहिमेंतर्गत तालुकास्तरावर व गावस्तरावर एकूण ९१ शिबीरे आयोजित करण्यात आले होते. या मोहिमेत राज्य सरकारच्या आपले सरकार तक्रार पोर्टलवरील २४२ आणि शिबिरात प्राप्त ३४७ असे एकूण ५८९ तक्रार अर्ज निकाली काढण्यात आले. या मोहिमेंतर्गत लाभार्थ्यांना विविध दाखल्यांचे वितरण करण्यात आले. यात जन्म-मृत्यू दाखला,जात दाखला, उत्पन्न दाखले, संजय गांधी निराधार योजनेचा लाभ इत्यादी लाभाचे वितरण करण्यात आले.
या मोहिमेत जिल्हा प्रशासनासह उपविभागीय कार्यालय, तहसिल कार्यालय, जिल्हा परिषद, विविध प्रशासकीय विभाग आणि ग्रामपंचायतींनी तालुका व गावस्तरावर शिबिरांचे आयोजन करुन पात्र लाभार्थ्यांना विविध शासकीय योजनांचे लाभ वितरित केले. 000
