सिंचन योजनांची १ मार्चपासुन प्रगणना;जिल्हा जलसंधारण अधिकाऱ्यांचे ‘वाल्मि’त प्रशिक्षण
छत्रपती संभाजीनगर, प्रतिनिधी- येत्या १ मार्च पासून राज्यात सिंचन योजनांची प्रगणना सुरु होणार आहे. त्यासाठी राज्यातील सर्व जिल्हा जलसंधारण अधिकाऱ्यांचे प्रशिक्षण जल व भूमी व्यवस्थापन संस्था (वाल्मी) येथे दि.२० व २१ रोजी पार पडले.
केंद्रशासनाकडून नव्याने सुरु होणाऱ्या लघु सिंचन योजनांची ७ वी प्रगणना व जलसाठा योजनांची दुसरी व मोठ्या;मध्यम प्रकल्पांच्या पहिल्या प्रगणनेसाठी हे राज्यस्तरीय प्रशिक्षण होते. राज्य प्रगणना आयुक्त तथा आयुक्त मृद व जलसंधारण विभाग प्रकाश खपले यांच्या अध्यक्षतेखाली हे प्रशिक्षण पार पडले. या प्रशिक्षणात निर्मित सिंचन क्षमता व पाण्याचा वापर याबाबतची निश्चित माहिती गोळा करणे,दीर्घकालीन व अल्पकालीन सिंचन योजनांच्या आखणीसाठी नियोजन करणे, भूजल पाणीसाठ्याच्या उपलब्धतेबाबत अंदाज वर्तविणे, जल योजनांबाबत भविष्यात धोरण निश्चित करणे हे होते. या प्रशिक्षणात राज्यातील मृद व जलसंधारण विभाग व जलसंपदा विभागाचे वरिष्ठ अधिकारी उपस्थित होते. जलशक्ती मंत्रालयातील वरिष्ठ अधिकारी श्रीमती प्रियंका कुलश्रेष्ठा व अजय बक्षी यांनी उपस्थितांना दुरदृष्यप्रणालीद्वारे मार्गदर्शन केले. प्रादेशिक जलसंधारण अधिकारी हरीभाऊ गिते, दिलीप निपाणे, सहसंचालक श्रीमती मृनालिनी भूत यांनी उपस्थितांना मार्गदर्शन केले. या प्रगणनेमध्ये राज्यातील सर्व लघु सिंचन योजनांची जलसाठ्याची व मध्यम मोठ्या प्रकल्पाची तसेच झऱ्यांची मोबाईल ॲप व वेब पोर्टलद्वारे प्रगणना होणार आहे. प्रशिक्षणाच्या आयोजनासाठी अप्पर आयुक्त तथा नोडल अधिकारी (प्रगणना) नितीन दुसाने मृद व जलसंधारण विभाग यांच्या मार्गदर्शानाखाली सांख्यिकी कक्षातील अधिकारी व कर्मचारी तसेच आयुक्त कार्यालयातील सर्व अधिकारी, कर्मचारी यांनी परिश्रम घेतले.
आता सर्व जिल्हा जलसंधारण अधिकारी हे आपापल्या जिल्हा कार्यक्षेत्रात जाऊन तेथील प्रगणकांना प्रशिक्षित करतील,असे नितीन दुसाने यांनी सांगितले.०००००
