नवी मुंबई महानगरपालिकेची कारवाई -प्लास्टिक प्रतिबंधात्मक मोहीमेंतर्गत एप्रिलच्या पंधरवड्यात 85 हजार दंडात्मक वसूली व 283.700 किलो प्लास्टिक जप्त…
नवी मुंबई प्रतिनिधी – प्लास्टिक प्रतिबंधात्मक मोहीमांव्दारे एकल वापरातील प्लास्टिकचा वापर थांबविण्यासाठी महापालिका आयुक्त डॉ.कैलास शिंदे यांच्या मार्गदर्शनाखाली नवी मुंबई महानगरपालिकेची विशेष पथके मार्केटमध्ये तपासणी करीत आहेत तसेच प्लास्टिकचा साठा वितरणासाठी वाहतुक करणा-या वाहनांवरही लक्ष ठेवून कारवाई करीत आहेत. अशा प्रकारच्या दोन प्रतिबंधात्मक धडक कारवाया लागोपाठ 2 दिवस परिमंडळ 2 च्या प्लास्टिक प्रतिबंधात्मक भरारी पथकांच्या वतीने उपआयुक्त डॉ.कैलास गायकवाड यांच्या नियंत्रणाखाली करण्यात आल्या. यामध्ये 17 एप्रिल रोजी महापे एमआयडीसी परिसरात दुचाकी वाहनावरून प्रतिबंधात्मक प्लास्टिकचा 20 किलो साठा वाहून नेणा-या दुचाकी वाहनावर कारवाईचा बडगा उगारण्यात आला व त्याच्याकडील प्लास्टिक जप्त करून 5 हजार दंडात्मक रक्कम वसूल करण्यात आली.
त्याचप्रमाणे याच परिमंडळ 2 च्या पथकाने 18 एप्रिल रोजी ऐरोली टोल नाका येथे 60 किलो प्रतिबंधात्मक प्लास्टिक दुचाकीवरून वाहतुक करणा-या व्यक्तीकडूनही 5 हजार दंडात्मक रक्कम वसूली करून 60 किलो प्लास्टिक जप्त करण्यात आले.
याशिवाय 17 एप्रिलला कोपरखैरणे येथे सेक्टर 18 मधील रावराय जनरल स्टोअर्स यांचेकडून 5 किलो प्लास्टिक पिशव्यांचा साठा जप्त करून 5 हजार दंडात्मक रक्कम वसूली करण्यात आली. त्याचप्रमाणे सेक्टर 20 ऐरोली येथे महेंद्र प्रजापती यांचेकडूनही 1 किलो प्लास्टिक पिशव्या जप्त करून 5 हजार दंडात्मक रक्कम वसूल करण्यात आली.
अशाप्रकारे परिमंडळ 1 व परिमंडळ 2 च्या प्लास्टिक प्रतिबंधात्मक भरारी पथकांमार्फत उपआयुक्त श्री.सोमनाथ पोटरे व डॉ.कैलास गायकवाड यांच्या नियंत्रणाखाली एप्रिल महिन्याच्या पहिल्या पंधरवड्यात 17 व्यक्ती / व्यावसायिकांकडून 85 हजार इतकी दंडात्मक रक्कम वसूल करण्यात आलेली असून 283 किलो 700 ग्रॅम प्रतिबंधात्मक एकल वापर प्लास्टिक साठा जप्त करण्यात आलेला आहे.
तरी विशेषत्वाने एकल वापर प्लास्टिकमुळे मानवी जीवनाला व पर्यावरणाला पोहचणारा धोका लक्षात घेऊन नागरिकांनी स्वत:हून स्वयंस्फूर्तीने प्लास्टिक पिशव्यांचा वापर पूर्णत: टाळावा व कापडी /कागदी पिशव्यांचा पर्याय निवडावा तसेच व्यावसायिकांनीही आपल्या वस्तू देण्यासाठी प्लास्टिक पिशव्या देऊ नयेत व प्लास्टिक पिशव्या दुकानात ठेवूच नयेत असे आवाहन नवी मुंबई महानगरपालिकेच्या वतीने करण्यात येत आहे.
000000000
