अनुसूचित व नवबौद्ध मुला-मुलींच्या शासकीय निवासी शाळेत प्रवेश प्रक्रिया सुरू
सांगली, प्रतिनिधी: महाराष्ट्र शासन सामाजिक न्याय व विशेष सहाय्य विभागामार्फत सांगली जिल्ह्यामध्ये अनुसूचित व नवबौद्ध मुलां / मुलींच्या 200 क्षमता असणाऱ्या शासकीय निवासी शाळा कार्यरत आहेत. सन 2025-26 या शैक्षणिक वर्षाकरिता मुला-मुलींच्या शासकीय निवासी शाळांमध्ये ऑफलाईन (मॅन्युअली) प्रवेश प्रक्रिया सुरु झालेली आहे. प्रवेश अर्ज शासकीय निवासी शाळा व सहाय्यक आयुक्त, समाज कल्याण कार्यालय, सांगली येथे उपलब्ध असल्याचे समाज कल्याण सांगली कार्यालयाचे सहाय्यक आयुक्त मेघराज भाते यांनी प्रसिध्दीपत्रकाव्दारे कळविले आहे.
इयत्ता 6 वी ते 10 वी सेमी इंग्रजी माध्यम या वर्गासाठी तसेच 5 वी पास मुला/मुलींसाठी मुलांची शासकीय निवासी शाळा कवठेएकंद, विटा, कवठेमहांकाळ व कडेगाव तर मुलींची शासकीय निवासी शाळा बांबवडे व जत या निवासी शाळांमध्ये प्रवेश प्रक्रिया सुरु झाली आहे.
सांगली जिल्ह्यातील मुला/मुलींच्या शासकीय निवासी शाळांमध्ये विद्यार्थी/विद्यार्थिनींना कोणतीही फी न घेता मोफत प्रवेश दिला जातो. निवासी शाळेत मुला/मुलींना सुसज्ज शासकीय इमारतीत निवास, निवास साहित्य, भोजन, दैनंदिन वापराचे साहित्य, पाठ्यपुस्तके, वह्या, इतर शैक्षणिक साहित्य व गणवेश अशा प्रकारच्या सुविधा मोफत दिल्या जातात. विद्यार्थी/विद्यार्थिनींच्या सर्वांगीण विकासाकरिता सुसज्ज अद्ययावत वर्ग खोल्या, ग्रंथालय, व्यायामशाळा, ई-लर्निंग, मनोरंजन कक्ष इत्यादी सोयी सुविधेसह विविध उपक्रमांचे आयोजन केले जाते.
प्रवेशासाठी प्रवर्गनिहाय जागा आरक्षित व मर्यादित असून अनुसूचित जाती व नवबौद्ध 80 टक्के, अनुसूचित जमाती 10 टक्के, विजाभज 5 टक्के, दिव्यांग 3 टक्के, एस.बी.सी. 2 टक्के याप्रमाणे शासकीय निवासी शाळेत प्रवेश निश्चित केला जातो. प्रवेशासाठी शाळेचे मुख्याध्यापक यांच्याशी संपर्क साधावा, असे प्रसिध्दी पत्रकात म्हटले आहे.
निवासी शाळानिहाय मुख्याध्यापकांचे नाव व कंसात त्यांचा संपर्क क्रमांक पुढीलप्रमाणे. (१) मुलांची शासकीय निवासी शाळा कवठेएकंद ता. तासगांव – पी. सी. भातलंवडे (9284801040). (२) मुलांची शासकीय निवासी शाळा विटा ता. खानापूर – प्रीतम भोसले (7028010118). (३) मुलांची शासकीय निवासी शाळा कवठेमहांकाळ ता. कवठेमहांकाळ – डी. बी. धवसे (9420836631). (४) मुलांची शासकीय निवासी शाळा वांगी ता. कडेगांव – एस. एच. भोसले (8698029878). (५) मुलींची शासकीय निवासी शाळा बांबवडे ता. पलूस – तानाजी करचे (9766040998). (६) मुलींची शासकीय निवासी शाळा जत ता. जत – डी. डी. जाधव (8275207276).
00000
