जिल्ह्यात २८ व २९ ऑक्टोबरला तुरळक ठिकाणी हलक्या पावसाची शक्यता-हवामान अंदाजाच्या पार्श्वभूमीवर शेतकऱ्यांना कृषी विज्ञान केंद्राचा सल्ला
बुलढाणा, प्रतिनिधी : भारतीय हवामान विभागाने वर्तविलेल्या पाच दिवसीय हवामान अंदाजानुसार, ‘अर्णब’ चक्रीवादळाच्या प्रभावामुळे बुलढाणा जिल्ह्यात २८ व २९ ऑक्टोबर रोजी तुरळक ठिकाणी हलक्या पावसाची शक्यता आहे. तर ३० व ३१ ऑक्टोबर रोजी जिल्ह्यात हवामान कोरडे राहण्याचा अंदाज आहे. या कालावधीत काही ठिकाणी आकाश मुख्यतः निरभ्र ते अंशतः ढगाळ राहण्याची शक्यता वर्तविण्यात आली आहे
या संभाव्य हवामान बदलाच्या पार्श्वभूमीवर शेतकऱ्यांनी पिकांची आणि काढणी केलेल्या शेतमालाची योग्य काळजी घ्यावी, असे आवाहन ग्रामीण कृषी मौसम सेवा, जिल्हा कृषी हवामान केंद्र, कृषी विज्ञान केंद्र, बुलढाणा यांच्या वतीने करण्यात आले आहे.
शेतकऱ्यांसाठी कृषी सल्ला : तुरळक ठिकाणी हलका पाऊस पडण्याची शक्यता लक्षात घेता, शेतकऱ्यांनी काढणी केलेला शेतमाल सुरक्षित आणि कोरड्या ठिकाणी साठवून ठेवावा. ओलीताखालील करडीची पेरणी ऑक्टोबर महिन्याच्या शेवटपर्यंत करता येईल. पेरणीपूर्वी बियाणे रात्रभर पाण्यात भिजवून घेतल्यास त्याची उगवण लवकर आणि चांगली होण्यास मदत होते. रब्बी पिकांची पेरणी करताना लवकर परिपक्व होणाऱ्या आणि पाण्याचा ताण सहन करू शकणाऱ्या वाणांची निवड करावी. एल निनो सदृश परिस्थिती लक्षात घेता, पाण्याची गरज कमी करण्यासाठी फळझाडांच्या सुकलेल्या, रोगट आणि अतिरिक्त फांद्या काढून टाकाव्यात. यामुळे उपलब्ध पाण्याचा कार्यक्षम वापर करण्यास मदत होईल.
जनावरांना केवळ वाळलेला चारा दिल्याने जनावरांच्या सर्व पोषणविषयक गरजा पूर्ण होत नाहीत. त्यामुळे जनावरांचे वय, वजन, दूध उत्पादन आणि शारीरिक अवस्था लक्षात घेऊन आहाराचे नियोजन करावे. आवश्यकतेनुसार संतुलित पशुखाद्य, खनिज मिश्रण आणि मीठ द्यावे. शेतकऱ्यांनी हवामानाच्या अंदाजानुसार शेतीविषयक कामांचे नियोजन करून पिके, शेतमाल आणि पशुधनाची योग्य काळजी घ्यावी, असे कृषी विज्ञान केंद्राच्या वतीने सुचविण्यात आले आहे.
0000
