दुर्गा मूर्ती विसर्जनाच्या वेळी अचानक नदीची पातळी वाढली; 7 जणांचा मृत्यू, 10 जण जखमी…
पश्चिम बंगाल प्रतिनिधी
अचानक नदीच्या पाण्याची पातळी वाढली व लाटा इतक्या वेगाने उसळू लागल्या की लोकांना वेळीच बाहेर पडता आले नाही.
पश्चिम बंगालमधील जलपाईगुडी जिल्ह्यात दुर्गापूजा विसर्जनाच्या वेळी नदीतील पाण्याची पातळी अचानक वाढल्याने सात जणांचा मृत्यू झाला आहे. ही घटना बुधवारी संध्याकाळी जलपाईगुडी जिल्ह्यातील माल नदीची आहे. येथे माल नदीवर अनेकजण विसर्जनासाठी आले होते. त्यावेळी अचानक पाण्याची पातळी वाढू लागली. अशा परिस्थितीत लोक अडकले आणि बघता बघता 7 जणांचा बुडून मृत्यू झाला.
या घटनेचा धक्कादायक व्हिडिओही समोर आला आहे. त्या व्हिडिओमध्ये अनेक लोक मूर्ती विसर्जनासाठी नदीत उतरले असल्याचे दिसत आहे. मात्र त्यानंतर अचानक नदीच्या पाण्याची पातळी वाढली व लाटा इतक्या वेगाने उसळू लागल्या की लोकांना वेळीच बाहेर पडता आले नाही. घटनास्थळी आरडाओरडा होऊन गोंधळाचे वातावरण निर्माण झाले होते. त्यानंतर अधिकाऱ्यांनी बचावकार्य सुरू केले. आतापर्यंत 7 जणांचा मृत्यू झाल्याची पुष्टी झाली असून 10 जण जखमी झाले आहेत.
