ध्वनीची विहित मर्यादा राखून विशिष्ट सण, उत्सवासाठी ध्वनीवर्धक व ध्वनीक्षेपक वापरण्यास सवलत
सांगली, प्रतिनिधी) : विशिष्ट सण, उत्सव, समारंभासाठी शासनाने ध्वनी प्रदूषण (नियमन व नियंत्रण) नियम 2000 नुसार ध्वनीची विहित मर्यादा राखून ध्वनीवर्धक व ध्वनीक्षेपक वापरण्यास सवलत दिली आहे. महाराष्ट्र शासनाच्या पर्यावरण विभाग शासन निर्णय दिनांक 5 सप्टेंबर 2016 व दिनांक 22 ऑगस्ट 2017 नुसार ही सवलत देण्यात आली आहे. त्यानुसार ध्वनीची विहित मर्यादा राखून कार्यक्रमासाठी सकाळी 6 वाजल्यापासून ते रात्री 12 वाजेपर्यंत सवलत देण्याकामी राज्य शासनाने संबंधित जिल्ह्याचे जिल्हाधिकारी यांना प्राधिकृत केले आहे. त्या अनुषंगाने जिल्हा प्रशासनामार्फत पुढील नमुद सणांसाठी ध्वनीवर्धक व ध्वनीक्षेपक वापरण्यास सकाळी 6 ते रात्री 12 वाजेपर्यंत सवलतीचे आदेश जारी केले आहेत.
या आदेशानुसार दिनांक 19 फेब्रुवारी 2025 रोजी छत्रपती शिवाजी महाराज जयंती (शासकीय), 14 एप्रिल 2025 रोजी डॉ. बाबासाहेब आंबेडकर जयंती, 1 मे 2025 रोजी 1 मे महाराष्ट्र दिन, गणपती उत्सव – चार दिवस (28 ऑगस्ट 2025 दुसरा दिवस, 31 ऑगस्ट 2025 पाचवा दिवस विसर्जन, 2 सप्टेंबर 2025 सातवा दिवस, गौरी विसर्जन, 6 सप्टेंबर 2025 अनंत चर्तुर्थी), 5 सप्टेंबर 2025 रोजी ईद-ए-मिलाद, नवरात्र उत्सव – दोन दिवस (30 सप्टेंबर 2025 दुर्गाष्टमी, 2 ऑक्टेाबर 2025 खंडेनवमी, दसरा), 21 ऑक्टोबर 2025 रोजी (लक्ष्मीपूजन) दिपावली, 25 डिसेंबर 2025 रोजी ख्रिसमस, नाताळ व 31 डिसेंबर 2025 या सण / उत्सव साठी ध्वनीवर्धक व ध्वनीक्षेपक वापरण्यास सकाळी 6 ते रात्री 12 वाजेपर्यंत सवलत देण्यात आली आहे.
ही सवलत घोषित शांतता क्षेत्रासाठी लागू असणार नाही. घोषित शांतता क्षेत्रामध्ये ध्वनी प्रदूषणांची अंमलबजावणी करण्यासाठी महानगरपालिका हद्दीमध्ये आयुक्त, सांगली मिरज कुपवाड शहर महानगरपालिका, उप प्रादेशिक अधिकारी, जिल्हा प्रदूषण नियंत्रण मंडळ सांगली व पोलीस अधीक्षक सांगली आणि ग्रामिण व शहरी भागामध्ये उप प्रादेशिक अधिकारी, जिल्हा प्रदूषण नियंत्रण मंडळ सांगली व पोलीस अधीक्षक सांगली यांना प्राधिकृत केले असल्याचे आदेशात म्हटले आहे.00000
