रस्ता सुरक्षा व पर्यावरण विषयक जनजागृतीपर वॉकेथॉनला दीड हजारहून अधिक नागरिकांचा उत्साही प्रतिसाद..
नवी मुंबई प्रतिनिधी- रस्ता सुरक्षा आणि वाहतुक नियमांचे नागरिकांनी पालन करावे तसेच पर्यावरणाचे रक्षण करावे याविषयी जागरूकता निर्माण करण्यासाठी नवी मुंबई महानगरपालिकेच्या सहयोगाने अपोलो हॉस्पिटल्स, लेट्स सेलिब्रेट फिटनेस व द लर्नयार्ड यांनी आयोजित केलेली वॉकेथॉन 1500 हून अधिक नागरिकांनी उत्साहाने सहभागी होत यशस्वी केली.
नेरूळ जिमखान्यापासून 5 किमी. परिसरात चालत जात सहभागी पर्यावरण व सुरक्षेविषयी जागरूक नागरिकांनी विविध जनजागृतीपर संदेश देणारे फलक उंचावित, घोषणा देत व्यापक स्वरूपात जनजागृती केली. यावेळी हरित शहर म्हणून नावलौकिक जपणारे नवी मुंबई शहर शासनाच्या माझी वसुंधरा अभियानात अग्रभागी आहे आणि अग्रभागी राहणारच असा निश्चय प्रदर्शित करीत हरित शहराचा संदेशही नागरिकांनी दिला.
रस्ता सुरक्षा सप्ताह दरम्यान वॉकेथॉन सारख्या उपक्रमाच्या आयोजनातून नागरिकांच्या मनात आरोग्यासाठी चालण्याचे महत्व अधोरेखित करून देण्याप्रमाणेच त्यांच्यामध्ये वाहतुक नियमांचे पालन करण्याविषयी जबाबदारीची भावना व सुरक्षित प्रवासाबाबत जागरूकता निर्माण करण्याचा प्रयत्न करण्यात आला. नागरिकांनी उत्स्फुर्त प्रतिसाद देत जागरूकतेचा प्रत्यय दिला.
