क्रीडा प्रबोधिनीमध्ये प्रवेशासाठी२३ जूनपर्यंत नाव नोंदणी करण्याचे आवाहन
सांगली, प्रतिनिधी : शिवछत्रपती क्रीडापीठ म्हाळुंगे-बालेवाडी पुणे अंतर्गत राज्यात विविध क्रीडा प्रबोधिनी कार्यरत आहेत. सन २०२५-२६ साठी शिवछत्रपती क्रीडापीठांतर्गत ९ क्रीडा प्रबोधिनीत सरळप्रवेश (५० टक्के) व कौशल्य चाचणी (५० टक्के) प्रक्रियेअंतर्गत विहीत निकषानुसार निवासी व अनिवासी प्रवेश देण्यात येणार आहेत. प्रवेश प्रक्रिया चाचण्यांसाठी खेळाडूंनी नाव नोंदणी दिनांक २३ जून २०२५ सायंकाळी ५ वाजेपर्यंत जिल्हा क्रीडा अधिकारी कार्यालय सांगली येथे करावी, असे आवाहन जिल्हा क्रीडा अधिकारी किरण बोरवडेकर यांनी केले आहे.
प्रवेश प्रक्रियेसाठी अटी व शर्ती – सरळ प्रवेश / कौशल्य प्रवेश चाचणी – ७ जुलै २००६ नंतर जन्मलेले व ८ जुलै २०२५ रोजी पर्यंत १९ वर्ष पूर्ण झालेले खेळाडू. या चाचण्यांकरिता राष्ट्रीय व राज्यस्तरीय प्राविण्य अथवा सहभाग प्राप्त खेळाडूंनी संबंधित स्पर्धेचे प्राविण्य /सहभाग प्रमाणपत्र, वयाचा पुरावा इत्यादी माहिती चाचणीस्थळी आणणे बंधनकारक आहे. सोबत आवश्यक कागदपत्रे (मूळ प्रत व झेरॉक्स प्रत) – खेळाडूचा जन्माचा दाखला, राज्यस्तर स्पर्धा सहभाग / पदकप्राप्त /राष्ट्रीयस्तर सहभाग/ पदकप्राप्त प्रमाणपत्र, आधार कार्ड. हँडबॉल, जलतरण, सायकलिंग, फुटबॉल, ज्युदो, जिम्नॅस्टिक्स या खेळासाठी सरळ प्रवेश व कौशल्य प्रवेशासाठी विभागीय चाचणीचा दिनांक 26 व 27 जून 2025 असा आहे. अधिक माहितीसाठी आरती हळींगळी ( ८४११९४२४२४) व मधुरा सिंहासने (८६५२७१३४५६) यांच्याशी संपर्क साधावा, असे प्रसिद्धी पत्रकात म्हटले आहे.
००००००
