मुंबई सह उपनगरात धावणार अत्याधुनिक वंदे-मेट्रो लोकल…
राज्य प्रतिनिधी-मुंबईच्या उपनगरीय रेल्वे नेटवर्कचे आधुनिकीकरण करण्यासाठी मुंबई रेल्वे विकास महामंडळ लिमिटेड यांनी मोठे पाऊल उचलले आहे. एकूण दोन हजार आठशे छपन्न पूर्णपणे वातानुकूलित वंदे-मेट्रो शैलीतील डब्यांच्या खरेदीसह त्यांच्या दीर्घकालीन देखभालीसाठी निविदा जारी करण्यात आली आहे. ही खरेदी मुंबई शहरी परिवहन प्रकल्पाच्या तिसऱ्या टप्पाच्या अंतर्गत करण्यात येणार आहे.
सध्याच्या घडीला मुंबईतील बहुतेक लोकल गाड्या बारा डब्यांच्या असून काही ठिकाणी पंधरा डब्यांच्या रचना आहेत. नव्या खरेदीत पंधरा डब्यांच्या गाड्यांबरोबरच गरजेनुसार अठरा डब्यांच्या रचना उपलब्ध होणार आहेत. त्यामुळे प्रवासी क्षमतेत मोठी वाढ होऊन गर्दी कमी होईल, सुरक्षितता व सोयींमध्येही वाढ होईल
निविदेनुसार भीवपुरी मध्य रेल्वे आणि वाणगाव पश्चिम रेल्वे येथे अत्याधुनिक देखभाल केंद्रे उभारण्यात येणार आहेत. या केंद्रांमधून पुढील पस्तीस वर्षे वंदे-मेट्रो रॅकची देखभाल केली जाईल. निविदा प्रक्रिया ८ डिसेंबर २०२५ पासून सुरू होईल आणि २२ डिसेंबर २०२५ रोजी ती उघडण्यात येईल.
या गाड्यांमध्ये आधुनिक तांत्रिक सुविधा उपलब्ध असतील. पूर्णपणे वातानुकूलित रचना, स्वयंचलित दरवाजे, गादीदार आसने, माहिती प्रणाली, मोबाइल चार्जिंग व्यवस्था, उच्च दर्जाची थंडगार हवा निर्माण करणारी यंत्रणा, तसेच प्रगत सुरक्षा प्रणाली यांचा समावेश असेल. या गाड्या ताशी एकशे तीस किमी वेगाने धावण्याची क्षमता ठेवतात आणि गर्दीच्या वेळीही प्रवाशांना आरामदायी प्रवास देतील.
एमआरव्हीसीचे अध्यक्ष व व्यवस्थापकीय संचालक विलास वाडेकर यांनी सांगितले की, या खरेदीमुळे मुंबईच्या वाहतूक व्यवस्थेत ऐतिहासिक बदल घडेल. प्रवाशांना वेळेवर, सुरक्षित आणि आरामदायी सेवा मिळेल. करार झाल्यानंतर दोन वर्षांच्या आत पहिला नमुना रॅक मुंबईकरांना उपलब्ध होईल.
