समुद्र से समृद्धी उपक्रमांतर्गत सागरी व ऊर्जा प्रकल्पांचे उद्घाटन प्रधानमंत्री नरेंद्र मोदी यांच्या हस्ते….

राज्य प्रतिनिधी -गुजरातमधील विविध विकासकामांच्या माध्यमातून देशाच्या प्रगतीला वेग देण्यासाठी आज पंतप्रधान नरेंद्र मोदी हे राज्यात एका दिवसाच्या दौऱ्यावर आहेत. या दौऱ्यात ते ‘समुद्र से समृद्धी’ या महत्त्वाकांक्षी उपक्रमाअंतर्गत एकूण चौतीस हजार दोनशे कोटी रुपयांहून अधिक किमतीच्या प्रकल्पांची पायाभरणी आणि उद्घाटन करण्यात आले. यात बंदर विकास, ऊर्जा, वाहतूक, आरोग्य आणि शहरी सुविधा या सर्वच क्षेत्रांचा समावेश असून या प्रकल्पांमुळे केवळ गुजरातच नव्हे तर संपूर्ण देशाच्या आर्थिक घडामोडींना चालना मिळणार आहे.

या प्रकल्पांमध्ये मुंबईतील अत्याधुनिक क्रूझ टर्मिनल, कोलकाता आणि पारादीप बंदरांवरील नव्या कंटेनर सुविधा तसेच कांडला दीनदयाळ बंदर येथे उभारण्यात येणारा हरित जैव-मिथेनॉल प्रकल्प यांचा विशेष समावेश आहे. त्याचबरोबर एलएनजी पायाभूत सुविधा, अक्षय ऊर्जा निर्मिती प्रकल्प, राष्ट्रीय महामार्गांचे आधुनिकीकरण, आरोग्यसेवा उभारणी आणि शहरी वाहतुकीचे उन्नतीकरण हे घटक प्रकल्पांचा अविभाज्य भाग आहेत. या सर्व कामांमुळे रोजगार निर्मिती, गुंतवणूक वाढ आणि पर्यावरणपूरक विकासाला मोठा हातभार लागणार आहे.

पंतप्रधान मोदींच्या उपस्थितीत होणाऱ्या या कार्यक्रमांमुळे ‘समुद्र से समृद्धी’ या संकल्पनेला व्यावहारिक रूप मिळणार असून किनारपट्टी भागातील जनतेला थेट लाभ होणार आहे. जागतिक स्तरावर भारताच्या सागरी सामर्थ्याला अधिक बळकटी देण्याबरोबरच निर्यात-आयात व्यापारात वाढ होईल. या माध्यमातून भारताचे जागतिक व्यापारजगतामधील स्थान आणखी सक्षम होईल, अशी अपेक्षा व्यक्त केली जात आहे.