युरोप विमानतळांवर सायबर हल्ला – प्रवाशांची गैरसोय
विदेश प्रतिनिधी-युरोपमधील प्रमुख विमानतळांवर मोठ्या प्रमाणात सायबर हल्ला झाल्याने विमानवाहतुकीवर त्याचा गंभीर परिणाम झाला आहे. या हल्ल्यामुळे लंडन, ब्रुसेल्स आणि बर्लिनसह महत्त्वाच्या विमानतळांवरील संगणकीय व्यवस्था ठप्प झाली असून प्रवाशांना मोठ्या गैरसोयींचा सामना करावा लागत आहे. चेक इन आणि सामान नोंदणीची प्रक्रिया थांबल्यामुळे हजारो प्रवासी विमानतळांवर अडकून पडले आहेत.
हा हल्ला ‘कोलिन्स एरोस्पेस’ या आंतरराष्ट्रीय कंपनीच्या संगणकीय प्रणालीवर झाल्याचे सांगण्यात आले आहे. ही कंपनी जगभरातील विमान कंपन्यांना चेक इन आणि प्रवासी व्यवस्थापनासाठी तांत्रिक सेवा पुरवते. कंपनीच्या सॉफ्टवेअरमध्ये झालेल्या बिघाडामुळे स्वयंचलित चेकइन व सामान तपासणी सेवा कोलमडून पडल्या आहेत.शुक्रवारी रात्री सुरू झालेला हा तांत्रिक अडथळा शनिवारी सकाळपर्यंत अनेक विमानतळांवर पसरला. कंपनीने तातडीने मानवी हस्तक्षेपाद्वारे सेवा सुरू ठेवण्याचा प्रयत्न केला असला तरी उड्डाण वेळापत्रकात मोठ्या प्रमाणावर विलंब झाला आहे. प्रवाशांना तासन्तास रांगेत उभे राहून प्रक्रिया पूर्ण करावी लागत आहे.
लंडन-हीथ्रो, ब्रुसेल्स आणि बर्लिन विमानतळ प्रशासनाने प्रवाशांना विशेष सूचना जारी केल्या आहेत. प्रवाशांनी वेळेआधी विमानतळावर पोहोचावे, कारण सर्व प्रक्रिया हाताने केली जाणार असल्याने त्यास अधिक वेळ लागू शकतो. तसेच, काही उड्डाणांचे वेळापत्रक बदलले जाण्याची शक्यता असल्याचेही सांगण्यात आले आहे.
सायबर सुरक्षाविशारदांच्या मते, ही घटना विमानवाहतुकीच्या सुरक्षेसाठी मोठे आव्हान आहे. भविष्यात अशा प्रकारच्या हल्ल्यांना अटकाव करण्यासाठी युरोपीय संघाने कडक उपाययोजना करणे आवश्यक आहे. हवाई प्रवास सुरक्षित ठेवण्यासाठी आधुनिक सायबर सुरक्षा यंत्रणा अधिक बळकट करण्याची गरज असल्याचे त्यांनी स्पष्ट केले.
