महिला व बाल विकास कार्यालयाकडून तयार केलेल्यानारीबलम पुस्तिकेचे जिल्हाधिकारी अशोक काकडे यांच्याहस्ते प्रकाशन
सांगली, प्रतिनिधी : नवरात्रोत्सवामध्ये दिनांक 22 ते 30 सप्टेंबर 2025 या कालावधीत पालकमंत्री चंद्रकांत पाटील यांच्या प्रेरणेतून व जिल्हाधिकारी अशोक काकडे यांच्या मार्गदर्शनाखाली महिला विकासाच्या अनुषंगाने राज्य शासनाच्या विविध विभागांच्या योजनांच्या एकत्रिकरणाव्दारे जवळपास 27 हून अधिक योजना व लाभार्थी संख्या यावर आधारीत वृत्तमालिका व लेखमालिका प्रसारीत करण्यात आली होती. यासाठी विविध शासकीय योजनांची माहिती जिल्हा महिला व बाल विकास अधिकारी कार्यालयाकडून संकलित करण्यात आली होती. त्या योजनांची माहिती देणाऱ्या ‘नारीबलम’ या पुस्तिकेचे प्रकाशन आज जिल्हाधिकारी अशोक काकडे यांच्याहस्ते करण्यात आले.
जिल्हाधिकारी कार्यालयात झालेल्या या कार्यक्रम प्रसंगी निवासी उपजिल्हाधिकारी डॉ. स्नेहल कनिचे, जिल्हा महिला व बाल विकास अधिकारी वर्षा पाटील, जिल्हा पुरवठा अधिकारी आशिष फुलके, तहसिलदार लिना खरात यांच्यासह प्रांताधिकारी, तहसिलदार उपस्थित होते.
महिला सक्षमीकरण हा सामाजिक व आर्थिक विकासाचा महत्वाचा घटक असून त्यासाठी विविध शासकीय योजनांची अंमलबजावणी जिल्ह्यात प्रभावीपणे करण्यात येत आहे. जिल्हाधिकारी अशोक काकडे यांच्या माझी सांगली, माझा अभिमान या अभिनव उपक्रमांतर्गत नारीबलम या पुस्तिकेच्या माध्यमातून जास्तीत जास्त महिलांपर्यंत योजनांची माहिती पोहचविणे व योजनांचा लाभ देणे सुलभ होईल, असा विश्वास यावेळी व्यक्त करण्यात आला.
00000
