जनगणनेच्या पहिल्या टप्प्यात 16 मेपासून घरयादी व घरगणना होणार- निवासी उपजिल्हाधिकारी डॉ. स्नेहल कनिचे- 14 जूनपर्यंत चालणार कार्यवाही – प्रगणकांना परिपूर्ण माहिती देवून सहकार्य करण्याचे आवाहन
सांगली, प्रतिनिधी: जनगणना 2027 ही दोन टप्प्यांमध्ये शासनाकडून राबविली जाणार आहे. पहिला टप्पा हा घरयादी व घरगणनेचा असून, तो 16 मे 2026 ते 14 जून 2026 या दरम्यान पार पडणार आहे. जनगणनेचा कार्यक्रम हा अत्यंत महत्त्वाचा आहे. त्यामुळे 100 टक्के कुटुंबांची माहिती HLO ॲपमध्ये भरणे व कुटुंबांची गणना करणे आवश्यक आहे. नागरिकांनी घरयादी व घरगणनेच्या कामकाजासाठी आपल्या घरी येणाऱ्या प्रगणकांना अचूक व परिपूर्ण माहिती देवून जनगणनेच्या राष्ट्रीय कार्यक्रमास सहकार्य करावे, असे आवाहन जिल्हा जनगणना अधिकारी तथा निवासी उपजिल्हाधिकारी डॉ. स्नेहल कनिचे यांनी प्रसिध्दीपत्रकाव्दारे केले आहे.
घरयादी व घरगणनेच्या कामकाजासाठी 21 चार्ज स्तरावर 4 हजार 421 प्रगणक व 791 पर्यवेक्षक नियुक्त करण्यात आले आहेत. या प्रगणक व पर्यवेक्षक यांचे प्रशिक्षण हे दि. 23 एप्रिल 2026 ते दि.08 मे 2026 अखेर प्रत्येक चार्ज स्तरावर आयोजित केले होते. हे प्रशिक्षण जिल्हा स्तरावरून नियुक्त करण्यात आलेल्या 70 फील्ड ट्रेनर यांनी दिले आहे.
दिनांक 16 मे 2026 ते 14 जून 2026 या कालावधीमध्ये प्रगणक त्यांना नेमून दिलेल्या गावातील भागाला भेट देऊन प्रत्यक्ष घरगणना करणार आहेत. घरगणना करीत असताना ते शासनाने ठरवून दिलेले 34 प्रश्न घरातील प्रमुख अथवा उपस्थित व्यक्तीला विचारतील. ज्यामध्ये घराची स्थिती, कुटुंबांची माहिती, कुटुंबास उपलब्ध असलेल्या सोयी सुविधा तसेच कुटुंबाने धारण केलेली मालमत्ता व इतर माहिती यांचा समावेश असेल. सदरची माहिती HLO ॲपद्वारे जनगणना पोर्टलवर अपलोड केली जाणार आहे. जनगणनेची ही प्रक्रिया पूर्णतः डिजिटल असून नागरिकांच्या गोपनीयतेची पूर्ण काळजी घेण्यात आली आहे.
0000
