धक्कादायक मोठी बातमी निलंबनाची टांगती तलवार माजी पोलिस आयुक्त परमबीर सिंह यांच्यासह इतर २५ पोलिस अधिकाऱ्यांच्या निलंबनाची
मुंबई प्रतिनिधी : भ्रष्टाचारासह खंडणीप्रकरणी मुंबईसह ठाण्याच्या विविध पोलिस ठाण्यात, तसेच लाचलुचपत प्रतिबंधक विभागातही गुन्हा दाखल असलेल्या माजी पोलिस आयुक्त परमबीर सिंह यांच्यासह इतर २५ पोलिस अधिकाऱ्यांच्या निलंबनाची शिफारस पोलिस महासंचालकांनी राज्याच्या गृहविभागाकडे केली आहे. याबाबत पोलिस महासंचालक संजय पांडे यांनी गृहविभागाला अहवालही सादर केला आहे. यावर गृहविभागाकडून संबंधित अधिकाऱ्यांच्या सहभागाच्या पुराव्याबाबत माहिती मागविण्यात आली असून त्यानंतर या सर्व पोलिस अधिकाऱ्यांवर निलंबनाची कारवाई होण्याची शक्यता आहे.
अहवालात चार पोलिस उपायुक्त, दोन सहाय्यक पोलिस आयुक्त, पोलिस निरीक्षक, सहाय्यक पोलिस निरीक्षक आणि पोलिस उपनिरीक्षक दर्जाच्या काही अधिकाऱ्यांचा समावेश आहे. अकोला पोलिस दलातील पोलिस निरीक्षक भीमराव घाडगे यांनी परमबीर सिंह यांच्याविरुद्ध भ्रष्टाचाराचे आरोप करून त्यांची खुली चौकशी करण्याची विनंती लाचलुचपत प्रतिबंधक विभागाकडे केली होती. हा गुन्हा ठाणे शहरात घडल्याने त्याचा तपास नंतर ठाणे पोलिसांकडे वर्ग करण्यात आला होता. त्यानंतर परमबीर सिंह यांच्यावर मुंबईसह ठाण्यात खंडणीच्या गुन्ह्यांची नोंद झाली होती. त्यांच्यासह इतर पोलिसांवरही खंडणीसह भ्रष्टाचार केल्याचा आरोप आहे. परमबीर सिंह यांच्यासह इतर पोलिसांवर मुंबईसह ठाणे आणि लाचलुचपत प्रतिबंधक विभागात वेगवेगळे गुन्हे दाखल असून या सर्व गुन्ह्यांची चौकशी सुरू आहे. या सर्व गुन्ह्यांची पोलिस महासंचालक संजय पांडे यांनी गंभीर दखल घेत संबंधित पोलिसांवर निलंबनाची शिफारस करण्याची विनंती गृहविभागाकडे केली आहे. त्यावर या पोलिस अधिकाऱ्यांची खंडणीसह भ्रष्टाचाराच्या गुन्ह्यांत नेमकी काय भूमिका होती,त्यांचा कुठपर्यंत सहभाग होता याबाबतची माहिती गृह विभागाने मागविली आहे. त्यानुसार त्यांच्यावर कारवाई केली जाण्याची शक्यता आहे. त्यामुळे या पोलिस अधिकाऱ्यांमध्ये खळबळ उडाली आहे.
