दिवाळीत आकाशकंदील उडविण्यावर बंदी
रायगड– अलिबाग -दिवाळी सणाच्या पार्श्वभूमीवर नवी मुंबई पोलीस आयुक्तालयाच्या हद्दीत आकाशकंदील (Flying Lantern) हवेत सोडणे, विक्री करणे आणि साठा ठेवणे यावर भारतीय नागरिक सुरक्षा संहिता २०२३ चे कलम १६३ अन्वये मनाई आदेश लागू करण्यात आला आहे. हा आदेश दि. १७ ऑक्टोबर ते २४ ऑक्टोबर २०२५ या कालावधीत प्रभावी राहणार आहे.
पोलीस उपआयुक्त (विशेष शाखा) रश्मी नांदेडकर यांनी जारी केलेल्या आदेशानुसार, दिवाळीच्या काळात नागरिकांकडून मोठ्या प्रमाणावर प्रज्वलित आकाशकंदील हवेत सोडले जातात. हे कंदील जमिनीवर येताना आग लागणे, मालमत्तेचे नुकसान किंवा इतर गंभीर अपघात होण्याची शक्यता नाकारता येत नाही. त्यामुळे सार्वजनिक सुरक्षेच्या दृष्टीने ही बंदी आवश्यक असल्याचे आदेशात नमूद करण्यात आले आहे.
या आदेशानुसार नवी मुंबई पोलीस आयुक्तालयाच्या सर्व पोलीस ठाण्यांच्या हद्दीत प्रज्वलित आकाशकंदील उडविणे, विक्री करणे आणि साठा करणे पूर्णपणे प्रतिबंधित असेल.
या मनाई आदेशाचे उल्लंघन करणाऱ्यांविरुद्ध भारतीय न्याय संहिता २०२३ चे कलम २२३ अन्वये दंडात्मक कारवाई करण्यात येईल, असा इशारा पोलिसांनी दिला आहे.
नवी मुंबई पोलिसांनी नागरिकांना आवाहन केले आहे की, सण साजरा करताना सुरक्षिततेची काळजी घ्यावी आणि कायद्याचे पालन करून इतरांच्या जीवितास धोका निर्माण होणार नाही याची दक्षता घ्यावी.
