भारतीय हवाई दलाने तांत्रिक शाखेत अधिकारी संवर्गात पात्र व्यक्तींचा समावेशासाठी नवी योजना जाहीर
राज्य प्रतिनिधी-भारतीय हवाई दलाने तांत्रिक शाखेत अधिकारी संवर्गात पात्र व्यक्तींचा समावेशासाठी नवी योजना जाहीर केली असून गेट चाचणी अर्थात अभियांत्रिकी विभागासाठीच्या पदवीधर अभियोग्यता चाचणीमधील गुणसंख्येच्या आधारे पात्र उमेदवारांना यासाठी अर्ज करता येणार आहेत.
या नव्या उपक्रमांतर्गत, वैध गेट गुणसंख्या मिळवलेले उमेदवार हवाई दलाच्या निवड मंडळासमोरच्या चाचणीसाठी थेट निवडले जाण्यास पात्र ठरतील. ही निवड गुणवत्तेच्या आधारावर होणार असल्यामुळे उमेदवारांना एएफसीएटी अर्थात हवाई दलाच्या सामायिक प्रवेश चाचणीसारख्या प्राथमिक लेखी परीक्षेतून सूट दिली जाईल.
गेट गुणसंख्येच्या आधारावर राबवली जाणारी ही योजना केवळ तांत्रिक शाखेतील समावेशासाठीच लागू असेल. मात्र, एएफसीएटी ही यापुढेही तांत्रिक शाखेसह भारतीय हवाई दलाच्या सर्व शाखांमधील समावेशासाठी प्रमाणित प्रवेश चाचणी म्हणून भूमिका बजावत राहील.
