शिक्षक व पदवीधर मतदारसंघ निवडणुकीच्या पार्श्वभूमीवर मतदानाच्या दिवशीचे आठवडा बाजार पुढे ढकलले…
सांगली, प्रतिनिधी : पुणे विभाग पदवीधर व शिक्षक मतदारसंघ व्दिवार्षिक निवडणूक- २०२६ साठी सांगली जिल्ह्यात शुक्रवार, २३ ऑक्टोबर २०२६ रोजी मतदान होत आहे. मतदान प्रक्रिया शांततेत, निर्भय व पारदर्शक वातावरणात पार पाडण्यासाठी तसेच कायदा व सुव्यवस्था अबाधित राखण्यासाठी जिल्हाधिकारी तथा जिल्हादंडाधिकारी यांनी भारतीय नागरिक सुरक्षा संहिता २०२३ च्या कलम १६३ मधील अधिकारांचा वापर करून सांगली जिल्ह्यातील 23 ऑक्टोबर 2026 रोजी भरणारे एकूण 13 ठिकाणचे दैनंदिन वआठवडा बाजार पूर्णपणे बंद ठेवून पुढे ढकलण्यात येत असल्याचे आदेश जारी केले आहेत. आठवडा बाजार बंद असलेल्या गावांमध्ये मिरज तालुक्यातील बुधगाव, मालगाव, सांगली मनपा क्षेत्रातील पंचशिल नगर – प्रभाग क्रमांक 1 व कुपवाड मनपा क्षेत्रातील कुपवाड (वारणाली गेट, लक्ष्मी मंदिर, कापसे प्लॉट – प्रभाग 3), कवठेमहांकाळ तालुक्यातील देशिंग, तासगाव तालुक्यातील विसापूर, जत तालुक्यातील माडग्याळ, खानापूर (विटा) तालुक्यातील खानापूर, कडेगाव तालुक्यातील कडेगाव, वाळवा तालुक्यातील वाळवा, चिकुर्डे व आष्टा तसेच शिराळा तालुक्यातील शिरशी या गावांचा समावेश आहे. या आदेशाचे उल्लंघन करणाऱ्या व्यक्तींवर भारतीय न्याय संहिता 2023 चे कलम 223 कलमांतर्गत कायदेशीर दंडात्मक कारवाई करण्यात येईल, असे स्पष्ट केले आहे.
000000
