मध्य प्रदेश, छतरपूर जिल्ह्यातील बोअरवेलमध्ये 15 फूट खाली अडकलेल्या मुलीची सुटका…
मध्य प्रदेश : प्रतिनिधी; छतरपूर जिल्ह्यातील दौनी गावात बोअरवेलमध्ये 15 फूट खाली अडकलेल्या मुलीची सुटका करण्यात आलीय. अनेक यशस्वी प्रयत्नांनंतर मुलीला वाचवण्यात यश आलंय. मिळालेल्या माहितीनुसार, गुरुवारी दुपारी 3.30 च्या सुमारास ही मुलगी शेतातील बोअरवेलमध्ये पडली होती. माहिती मिळताच पोलीस, एसडीआरएफ आणि लष्कराचं पथक घटनास्थळी पोहोचलं आणि बचावकार्य सुरू केलं. रात्री एक वाजण्याच्या सुमारास मुलीला बोअरवेलमधून बाहेर काढण्यात आलंय.
दिव्यांशी या एक वर्षाच्या चिमुरडीला बोअरवेलमधून बाहेर काढल्यानंतर, प्रशासनाच्या पथकानं मुलीला तातडीनं रुग्णालयात दाखल केलं. मिळालेल्या माहितीनुसार, शेतात राजेश कुशवाह यांनी घर बांधलं असून, तिथं त्यांची पत्नी जानकी कुशवाह आणि एक वर्षाची मुलगी दिव्यांशी राहते. खेळत असताना दिव्यांशी घरापासून काही अंतरावर गेली आणि शेतातीलच उघड्या बोअरवेलमध्ये पडली.
बराच वेळ होऊनही दिव्यांशी न दिसल्याने कुटुंबातील लोकांनी आजूबाजूला तिचा शोध घेण्यास सुरुवात केली. कुटुंबीय मुलीचा शोध घेत असतानाच, अचानक बोअरवेलच्या आतून दिव्यांशीचा रडण्याचा आवाज येऊ लागला. कुटुंबीयांनी प्रथम तिला बाहेर काढण्याचा प्रयत्न केला, तो अयशस्वी झाल्यानंतर त्यांनी तत्काळ पोलिसांना घटनेची माहिती दिली. या प्रकरणाची माहिती मिळताच एसडीएम विनय द्विवेदी (SDM Vinay Dwivedi), तहसीलदार सुनीता सहानी, एसडीओपी कमलकुमार जैन, नौगाव स्टेशन प्रभारी दीपक यादव, लुगासी चौकीचे प्रभारी अतुल झा, गारोली चौकीसह मोठा पोलीस फौजफाटा घटनास्थळी दाखल झाला.
