नेरळ-माथेरान ट्रेन:पर्यटकांसाठी खुशखबर! 3 वर्षांनंतर पुन्हा सुरू होणार नेरळ-माथेरान ट्रेन…
कर्जत प्रतिनिधी
मध्य रेल्वेच्या एका वरिष्ठ अधिकाऱ्याने सांगितले, “नेरळ आणि अमन लॉज दरम्यान टॉय ट्रेनचा ट्रॅक आता तयार आहे. त्यामुळे प्रवासी सेवा लवकरच सुरू होईल.”
माथेरानला सतत येणाऱ्या पर्यटकांसाठी चांगली बातमी आहे. मध्य रेल्वेने नुकतेच नेरळ ते अमन लॉज दरम्यान चाचण्या सुरू केल्या आहेत. नेरळ ते माथेरान या संपूर्ण मार्गावर लवकरच प्रवासी रेल्वे सेवा (Neral-Matheran Train Service) सुरू होणार आहे. सध्या टॉय ट्रेनची सेवा फक्त अमन लॉज ते माथेरान दरम्यान चालते. पावसाळ्यात अनेक ठिकाणी वाहून गेलेल्या ट्रॅकच्या दुरुस्तीसाठी नेरळ आणि अमन लॉज दरम्यानची सुमारे 19 किमी अंतराची सेवा 2019 मध्ये बंद करण्यात आली होती.
मध्य रेल्वेच्या एका वरिष्ठ अधिकाऱ्याने सांगितले, “नेरळ आणि अमन लॉज दरम्यान टॉय ट्रेनचा ट्रॅक आता तयार आहे. त्यामुळे प्रवासी सेवा लवकरच सुरू होईल.” नेरळ-माथेरान लाईन 1907 मध्ये पीरभॉईजचा कौटुंबिक उपक्रम म्हणून सुरू करण्यात आली होती. मात्र, आता या लाईनचा समावेश संयुक्त राष्ट्रांच्या शैक्षणिक, वैज्ञानिक आणि सांस्कृतिक संघटनेच्या (UNESCO) जागतिक वारसा स्थळांच्या तात्पुरत्या यादीत करण्यात आला आहे.
