जिल्ह्यात कुष्ठरुग्ण शोध अभियान व सक्रीय क्षयरोग शोध मोहीम यशस्वीपणे राबवावी –मुख्य कार्यकारी अधिकारी डॉ.भरत बास्टेवाड

 

 

रायगड प्रतिनिधी- जिल्ह्यात कुष्ठरुग्ण शोध अभियान व सक्रीय क्षयरोग शोध मोहीम राबविण्यात येत आहे. मोहिमेदरम्यान आशासेविका, स्वंयसेवक व आरोग्य कर्मचारी घरोघरी सर्वेक्षण करून संशयित कुष्ठरुग्ण व क्षयरोग रुग्ण शोधणार आहेत. जनजागृती, तपासणी व उपचार या त्रिसुत्रीने संयुक्त कुष्ठरोग शोध अभियान व सक्रीय क्षयरुग्ण शोध मोहिम यशस्वीपणे राबविण्याच्या सूचना जिल्हा परिषदेचे मुख्य कार्यकारी अधिकारी डॉ.भरत बास्टेवाड यांनी आज आढावा बैठकीत दिल्या..

 

रायगड सहाय्यक संचालक, आरोग्य सेवा (कुष्ठरोग) व जिल्हा क्षयरोग अधिकारी यांच्या सयुक्त विद्यमाने कृष्ठरोग व सक्रिय क्षयरुग्ण शोध अभियान 2023 जिल्हा समन्वय समितीची बैठक डॉ.भरत बास्टेवाड यांच्या मार्गदर्शनाखाली संपन्न झाली. या मोहिमेअंतर्गत 354 पर्यवेक्षकांच्या नेतृत्वाखाली 1 हजार 958 पथके स्थापन करण्यात आली आहेत. शोध अभियाना दरम्यान नागरिकांनी क्षयरोग व कुष्ठरुग्ण या आजाराबाबत गैरसमज व भिती न बाळगता घरी येणाऱ्या पथकाला सहकार्य करावे, असे आवाहनही डॉ.बास्टेवाड यांनी यावेळी केले.

 

 

 

कुष्ठरुग्ण शोध अभियान व सक्रीय क्षयरोग शोध मोहिमेअंतर्गत जिल्ह्यातील 24 लाख 56 हजार 871 लोकसंख्येचे सर्वेक्षण करण्यात येणार असून, गृहभेटी दरम्यान 5 लाख 69 हजार 492 घरांचे भेटीचे नियोजन केले आहे. मोहिमेअंतर्गत घरातील सर्व सदस्यांची कुष्ठरोग व क्षयरोग संदर्भात संपुर्ण शारिरीक तपासणी करण्यात येणार आहे.

 

या बैठकीला जिल्हा आरोग्य अधिकारी डॉ.मनिषा विखे, सहाय्यक संचालक कुष्ठरोग डॉ.प्रताप शिंदे, जिल्हा क्षयरोग अधिकारी सचिन जाधव उपस्थित होते.

 

00000000