मुसळधार पावसामुळे नागरिकांना सतर्कतेचा इशारा..
मुंबई प्रतिनिधी-मुंबईसह उपनगरांमध्ये जोरदार पावसामुळे नागरिकांना पोलिसांकडून मोठा इशारा देण्यात आला आहे. भारतीय हवामान विभागाने मुंबईसाठी रेड अलर्ट जारी केला असून, मुसळधार पावसाचा तोच जोर सुरू आहे. यामुळे नागरिकांनी अत्यावश्यक कारणांशिवाय घराबाहेर न पडण्याचा सल्ला पोलिसांनी दिला आहे. तसेच समुद्रकिनारी व सखल भागात जाणे टाळण्याचेही आवाहन करण्यात आले आहे.
रात्रभर सुरू असलेल्या पावसामुळे मुंबईत अनेक ठिकाणी पाणी साचले असून किंग सर्कल, हार्बर मार्ग, सायन-कोंडली रेल्वे ट्रॅकजवळ पाणी साचल्यामुळे रेल्वे वाहतुकीवर परिणाम झाला आहे. विविध ठिकाणी वाहने पाण्यात अडकली असून काही ठिकाणी वाहतूकही मंदावली आहे. त्यामुळे मुंबईतील लोकल ट्रेन उशिराने धावत आहेत आणि काही ठिकाणी वाहतूक थांबलेली आहे.मुंबई पोलिसांनी आपल्या ट्विटर हँडलवरून सुद्धा नागरिकांना सतर्क राहण्याचे निर्देश दिले आहेत. कोणत्याही आपत्कालीन परिस्थितीत १००, ११२ किंवा १०३ या क्रमांकांवर संपर्क करण्याचे आवाहन पोलिसांनी केले आहे. तसेच, पोलिसांना देखील पूर्णपणे सतर्क राहण्याचे तसेच मदतीसाठी तयार राहण्याचे आदेश देण्यात आले आहेत.
मुंबईसह राज्यभरातही पावसाचा तडाखा आला असून काही ठिकाणी पाणी साचल्याने वाहतूक व्यवस्थेतही अडथळे येत आहेत. त्यामुळे पर्यावरणीय परिस्थिती लक्षात घेऊन नागरिकांनी खबरदारी घेणे गरजेचे आहे.
सध्याच्या परिस्थितीत नागरिकांनी अनावश्यक घराबाहेर पडणे टाळावे, विद्युत उपकरणांपासून दूर राहावे आणि कुठल्याही आपत्कालीन परिस्थितीत स्थानिक प्रशासनाशी संपर्क साधावा, अशी सूचना देण्यात येत आहे.
