आंतरजातीय विवाहित दांपत्यांनीआर्थिक सहाय्य योजनेचा लाभ घ्यावा- मुख्य कार्यकारी अधिकारी विशाल नरवाडे

 सांगली, प्रतिनिधी आंतरजातीय विवाहित दांपत्यांना प्रोत्साहन देण्यासाठी आर्थिक सहाय्य योजनेंतर्गत लाभ मिळण्यासाठी नवीन प्रस्ताव सादर करावेत, असे आवाहन जिल्हा परिषदेचे नूतन मुख्य कार्यकारी अधिकारी विशाल नरवाडे यांनी शासकीय प्रसिद्धीपत्रकाद्वारे केले आहे.

 या योजनेमध्ये अनुसूचित जाती / अनुसूचित जमाती व विमुक्त जाती, भटक्या जमाती यापैकी एक व्यक्ती व सवर्ण हिंदू, जैन, लिंगायत, शीख यापैकी दुसरी व्यक्ती अशांनी विवाह केल्यास आंतरजातीय विवाह संबोधण्यात येतो. शासन निर्णय दि. 6 ऑगस्ट 2004 व दि. 1 फेब्रुवारी 2010 अन्वये मागास वर्गातील अनुसूचित जाती, अनुसूचित जमाती, विमुक्त जाती, भटक्या जमाती यामधील आंतर प्रवर्गातील आंतरजातीय विवाहितांनाही ही योजना लागू करण्यात आली आहे. 1 फेब्रुवारी 2010 पूर्वी झालेल्या विवाहास 15 हजार रूपये व तद्नंतर झालेल्या विवाहास 50 हजार रूपये अर्थसहाय्य केले जाते.

 योजनेसाठी पात्रतेचे निकष – अर्जदार महाराष्ट्राचा रहिवासी असावा, विवाहित जोडप्यापैकी एक अनुसूचित जाती, अनुसूचित जमाती, विजाभज्‍/ विमाप्र व दुसरा सवर्णापैकी एक असावा, विवाहाची नोंदणी आवश्यक आहे.

 आवश्यक कागदपत्रे – विहित नमुन्यातील परिपूर्ण भरलेला अर्ज, सक्षम प्राधिकाऱ्याने दिलेला विवाह नोंदणी दाखला, वराचा व वधूचा (प्राथमिक/माध्यमिक) शाळा सोडल्याचा दाखला, वराचा व वधूचा जातीचा दाखला, वराचे व वधूचे तहसिलदार यांनी दिलेले अधिवास (डोमोसाईल) प्रमाणपत्र, दोन प्रतिष्ठीत व्यक्तींचे वर्तणुकीचे व रहिवासी दाखले, वधू व वराचा एकत्रित फोटो (4X6), विहित नमुन्यातील प्रतिज्ञापत्र, वधू व वर यांचे ओळखपत्र (आधारकार्ड / मतदान कार्ड / पॅन कार्ड / मतदान ओळखपत्र / ड्रायव्हिंग लायसन्स इत्यादीपैकी एक), वधू व वर यांच्या संयुक्त बँक खात्याची पासबुकची सत्यप्रत.

00000