मुंबईत अनधिकृत बांधकामांवर कारवाईला 30 ता स्थगिती; उच्च न्यायालयाचा आदेश
मुंबई : कोरोना संसर्गाच्या पार्श्वभूमीवर आज मुंबई उच्च न्यायालयाने अनधिकृत बांधकामांवरील कारवाईला ता. 30 पर्यंत अंतरिम स्थगिती दिली.
जे नागरिक न्यायालयात याबाबत दिलासा मागू शकत नाहीत त्यांना हे आदेश लागू आहेत. उच्च न्यायालयाच्या पूर्ण पीठाने आज आदेश जारी केले. यापूर्वी अंतरिम स्थगितीचा अवधी ता. 13 पर्यंत होता. मुख्य न्या. दिपांकर दत्ता, न्या ए ए सय्यद, न्या एस एस शिंदे, न्या पी बी वार्ले यांच्या पूर्ण पीठाने कोरोना कालावधीत वेळोवेळी अशी मुदतवाढ दिली आहे. न्यायालयाचे काम मर्यादित स्वरूपात सुरू असल्यामुळे हा निर्णय घेण्यात आला होता. मात्र आता राज्यातील परिस्थिती सुधारत आहे, असेही पूर्ण पीठाने स्पष्ट केले आहे.अनधिकृत बांधकामे, लिलाव, कारवाई यासाठी हे आदेश आहेत. न्यायालयाने याबाबत स्युमोटो जनहित याचिका केली आहे. ज्या ठिकाणी आवश्यकता असेल तेथे प्रशासन न्यायालय निर्णयाने कारवाई करु शकते, असेही न्यायालयाने म्हटले आहे.
