अण्णासाहेब पाटील महामंडळाचे डिजिटल पाऊल; मोबाईल ॲपमुळे लाभार्थ्यांना घरबसल्या सेवा उपलब्ध
डिजिटल प्रतिनिधी-अण्णासाहेब पाटील आर्थिक मागास विकास महामंडळाने लाभार्थ्यांच्या सोयीसाठी ‘Annasaheb Patil Mahamandal App’ हे मोबाईल ॲप सुरू केले असून, यामुळे आता योजनांची संपूर्ण प्रक्रिया थेट मोबाईलवर करणे शक्य झाले आहे. महामंडळाचा कारभार ऑनलाईन पद्धतीने संकेतस्थळावर सुरू असला तरी, लाभार्थ्यांना संगणक किंवा सायबर कॅफेवर अवलंबून राहावे लागत होते आणि काही ठिकाणी एजंटमार्फत फसवणुकीचे प्रकारही घडत होते. यावर उपाय म्हणून आणि लाभार्थ्यांना अधिक सुरक्षित, स्वयंपूर्ण सेवा देण्यासाठी हे युजर-फ्रेंडली ॲप विकसित करण्यात आले आहे. गुगल प्ले स्टोअरवर उपलब्ध असलेल्या या ॲपवर नवीन वापरकर्ते ओटीपीद्वारे नोंदणी करू शकतात, तर जुन्या लाभार्थ्यांना त्यांच्या विद्यमान आयडी-पासवर्डने लॉगिन करता येईल.
या ॲपद्वारे लाभार्थ्यांना एलओआय, मंजुरी आणि क्लेम या तिन्ही टप्प्यांवरील कागदपत्रे अपलोड करता येतील तसेच अर्जाची स्थितीही तपासता येईल. विशेष म्हणजे, पारदर्शकता वाढवण्यासाठी आता व्यवसायाचे जिओ-टॅग केलेले छायाचित्र अपलोड करणे अनिवार्य करण्यात आले असून, जिल्हा समन्वयकांमार्फत त्याची प्रत्यक्ष पडताळणी केली जाणार आहे. यामध्ये जिओ-फेन्सिंग आणि गूगल नकाशाचा वापर करून व्यवसाय पाहणीचे नियोजन केले जाईल व ही माहिती महामंडळाच्या ईएचआरएमएस प्रणालीशी जोडली जाईल. सर्व सुविधा आता एका क्लिकवर उपलब्ध असल्याने लाभार्थ्यांनी मोठ्या प्रमाणात हे ॲप डाऊनलोड करून डिजिटल उपक्रमाचा लाभ घ्यावा, असे आवाहन महामंडळाचे व्यवस्थापकीय संचालक विजयसिंह देशमुख यांनी केले आहे.
*****
