स्वित्झर्लंडमधील ‘दावोस’मध्ये गोव्याच्या ‘दैवी कणां’ची भुरळ; विज्ञानाला न उलगडणारे कोडे जागतिक पटलावर
राज्य
प्रतिनिधी जागतिक राजकारण आणि अर्थकारणाची दिशा ठरवणाऱ्या स्वित्झर्लंडमधील दावोस येथे संपन्न झालेल्या ‘वर्ल्ड इकॉनॉमिक फोरम २०२६’ (WEF) मध्ये यंदा एका आगळ्यावेगळ्या विषयाने सर्वांचे लक्ष वेधून घेतले. गोव्यातील महर्षि अध्यात्म विश्वविद्यालय (MAV) आणि आध्यात्मिक विज्ञान संशोधन संस्था (SSRF) यांच्या वतीने सादर करण्यात आलेल्या ‘दैवी कणांच्या’ (Divine Particles) संशोधनाने जागतिक स्तरावरील शास्त्रज्ञ आणि विचारवंतांना थक्क केले आहे. भौतिक शास्त्र आणि जाणीवेचा अभ्यास (Consciousness Studies) जिथे एकत्र येतात, अशा एका दुर्मिळ घटनेचे सादरीकरण जगप्रसिद्ध ‘हाऊस ऑफ पायोनिअर्स’मध्ये करण्यात आले.गोव्यापासून सुरू झालेला जागतिक प्रवास या विलक्षण घटनेची पहिली नोंद मार्च २०१२ मध्ये गोव्यातील आध्यात्मिक संशोधन केंद्रात झाली. सच्चिदानंद परब्रह्म डॉ. जयंत बाळाजी आठवले यांच्या हातावर हे दैवी कण सर्वप्रथम दिसून आले होते. संशोधक शॉन क्लार्क आणि श्वेता क्लार्क यांनी दावोसमध्ये माहिती दिली की, गेल्या १४ वर्षांत अशा प्रकारचे कण केवळ भारतातच नव्हे, तर जगातील २० पेक्षा जास्त देशांमध्ये आढळले आहेत. हे कण सोनेरी, चंदेरी, लाल, निळे आणि हिरवे अशा विविध आकर्षक रंगांत प्रकट होतात. ते केवळ मानवी त्वचेवरच नव्हे, तर कपडे, वस्तू आणि अगदी लॅमिनेशन केलेल्या फोटोच्या आतूनही प्रकट झाल्याची अनेक उदाहरणे समोर आली आहेत.
दावोसमध्ये प्रत्यक्ष प्रचिती: सादरीकरणाच्या दरम्यान घडला चमत्कार दावोस येथील सत्रात एक अनपेक्षित वळण आले, जेव्हा चर्चेदरम्यान एका महिला सहभागीच्या चेहऱ्यावर अचानक एक ‘दैवी कण’ प्रकट झाला. ही घटना केवळ योगायोग नव्हती, तर उपस्थित संशोधकांसाठी तो एक अभ्यासाचा विषय ठरला. या प्रसंगाचे त्वरित चित्रीकरण करण्यात आले, ज्यामुळे ही संकल्पना केवळ कागदावर किंवा सादरीकरणापुरती मर्यादित न राहता, उपस्थितांसाठी ती एक प्रत्यक्ष प्रचिती ठरली. या घटनेमुळे संपूर्ण सभागृहात कुतूहल आणि आश्चर्याचे वातावरण निर्माण झाले होते.
विज्ञानाची कसोटी: IIT आणि BARC चे निष्कर्ष या कणांचे स्वरूप शोधण्यासाठी भारताच्या अत्यंत प्रतिष्ठित अशा भाभा अणुसंशोधन केंद्र (BARC) आणि भारतीय तंत्रज्ञान संस्था (IIT), मुंबई येथे रासायनिक चाचण्या करण्यात आल्या. या चाचण्यांचे निष्कर्ष आधुनिक विज्ञानालाही विचार करायला लावणारे आहेत:१. रासायनिक संरचना: या कणांमध्ये ५४ ते ७२ टक्के कार्बन असून उर्वरित भागात ऑक्सिजन आणि नायट्रोजन आढळले आहेत.२. अनोखी रचना: कार्बन असूनही या कणांमध्ये हायड्रोजनचा अभाव आहे, त्यामुळे त्यांना सामान्य सेंद्रिय (Organic) पदार्थांच्या श्रेणीत ठेवता येत नाही. तसेच, ते दिसायला धातूसारखे लखलखीत असले, तरी त्यात सोने किंवा चांदी यांसारख्या कोणत्याही धातूचे अंश आढळले नाहीत.३. प्रतिकारशक्ती: अत्यंत जहाल समजल्या जाणाऱ्या नायट्रिक ॲसिड किंवा ‘ॲक्वा रिजिया’ (अम्लराज) सारख्या रसायनांचाही या कणांवर कोणताही परिणाम झाला नाही.४. स्पंदनांचे गूढ: वास्तुशास्त्र तज्ञ मयांक बडजात्या यांनी ‘लेचर अँटेना’द्वारे केलेल्या चाचणीत एक धक्कादायक बाब समोर आली. जगातल्या प्रत्येक नैसर्गिक वस्तूला स्वतःची स्पंदने (Vibrations) असतात, मात्र या कणांमधून कोणतीही स्पंदने जाणवली नाहीत. याचा अर्थ असा की, सध्याची ऊर्जा मोजणारी यंत्रे या कणांची सूक्ष्मता मोजण्यास सक्षम नसावीत.
ऊर्जा आणि पदार्थाचा संगम, या संशोधनाशी संबंधित ‘BARC’च्या एका माजी शास्त्रज्ञाने सांगितले की, आईन्स्टाईनच्या प्रसिद्ध E = mc² या सूत्रानुसार ऊर्जेचे रूपांतर पदार्थात होणे वैज्ञानिकदृष्ट्या शक्य आहे. आध्यात्मिक परिभाषेत, जेव्हा एखादी व्यक्ती आध्यात्मिकदृष्ट्या उन्नत असते, तेव्हा त्यांच्यातून प्रक्षेपित होणाऱ्या ‘दैवी चैतन्याचे’ (Chaitanya) घनीभवन होऊन अशा कणांची निर्मिती होऊ शकते.
आध्यात्मिक महत्त्व आणि जागतिक संक्रमण आध्यात्मिक संशोधनानुसार, हे कण म्हणजे केवळ भौतिक चमत्कार नसून ते सध्याच्या जागतिक संक्रमण काळात मानवासाठी मिळणारे एक ‘दैवी कवच’ आहे. कणांचा सोनेरी रंग हा शुद्धीकरणाचे, तर निळा रंग भक्तीचे प्रतीक मानला जातो. सच्चिदानंद परब्रह्म डॉ. जयंत बाळाजी आठवले यांच्या संकल्पामुळे साकारलेले हे कण मानवाला आंतरिक शांती आणि आध्यात्मिक सामर्थ्य देण्याचे कार्य करत आहेत.
“गोव्यात २०१२ मध्ये सुरू झालेली ही घटना आता दावोसमध्ये जागतिक चर्चेचा विषय बनली आहे. भौतिक विज्ञान, जाणीवेचा अभ्यास आणि अध्यात्मशास्त्र यांना जोडणारा हा एक क्रांतिकारी विषय असून, यावर अधिक सखोल आंतरशाखीय संशोधनाची गरज आहे,” असे मत महर्षि अध्यात्म विश्वविद्यालयाचे संशोधन प्रमुख शॉन क्लार्क यांनी व्यक्त केले.- श्री. शॉन क्लार्क, संशोधन प्रमुख आणि प्राध्यापक, महर्षि अध्यात्म विश्वविद्यालय
———————
