मोताळा शासकीय औद्योगिक प्रशिक्षण संस्था येथे विविध कार्यक्रमाचे आयोजन…
बुलडाणा, प्रतिनिधी: मोताळा शासकीय औद्योगिक प्रशिक्षण संस्था येथे रविवार दि. 12 जानेवारी 2025 रोजी सकाळी 11 वाजता स्वामी विवेकानंद जयंती निमित्त राष्ट्रीय युवा दिन साजरा करण्यात येत आहे. या दिनाचे औचित्य साधून संस्थेमध्ये विविध कार्यक्रमाचे आयोजन करण्यात आले आहे.
या कार्यक्रमात गुणवत्ता प्राप्त प्रशिक्षणार्थ्यांचा सत्कार करण्यात येईल. तसेच आत्मनिर्भर भारत, स्वामी विवेकानंद यांचे उद्योजकता, देशाच्या विकासात कौशल्याचे महत्व, एआय शाप की वरदान अशा विविध विषयांवर वक्तृत्व स्पर्धा, निबंध स्पर्धा व चित्रकला स्पर्धा घेण्यात येणार आहे. स्वामी विवेकानंद यांचा तरूणांच्या उत्तम शरीरयष्टीकडेही विशेष कल होता. त्यामुळे पारंपारिक क्रीडा स्पर्धा सुद्धा घेण्यात येणार आहे. या स्पर्धेतील उत्कृष्ट स्पर्धकांना प्रमाणपत्र देण्यात येईल.
कार्यक्रमात संस्थेचे अध्यक्ष, आमदार, समाजसेवक उद्योजक व व्याख्यानकार यांना आमंत्रित करण्यात आले आहे. त्याचप्रमाणे आजच्या तरूणांना पुढील भविष्याकरीता रोजगार व स्वयंरोजगार यांवर मार्गदर्शन सुद्धा केल्या जाणार आहे. त्यामुळे कार्यक्रमाचा आस्वाद घेण्यासाठी व आपल्या मुलांच्या पुढील उज्वल भवितव्यासाठी नागरीकांनी आणि विद्यार्थ्यांनी उपस्थित राहावे, असे आवाहन संस्थेचे प्राचार्य एस. ही गंगावणे यांनी केले आहे.0000000
