घणसोली विभागात प्लास्टिक प्रतिबंधात्मक मोहीमेत 15 हजार दंड वसूली व 30 किलो प्लास्टिक पिशव्या जप्त…
नवी मुंबई प्रतिनिधी प्रतिबंधात्मक प्लास्टिकचा वापर रोखण्यासाठी नागरिकांमध्ये जागरुकता निर्माण करण्याप्रमाणेच एकल वापर प्लास्टिक प्रतिबंधात्मक मोहीमा प्रभावीपणे राबविण्यात येत असून प्रतिबंधीत प्लास्टिक जप्त करण्यासोबतच दंडात्मक वसूलीही करण्यात येत आहे.
याकरिता स्थापित भरारी पथकांमार्फत तपासणी कार्यवाही करण्यात येत असते. आज परिमंडळ 2 च्या भरारी पथकाने उपआयुक्त डॉ. कैलास गायकवाड यांच्या नियंत्रणाखाली विभाग अधिकारी तथा सहा. आयुक्त श्री. संजय तायडे यांच्या माध्यमातून घणसोली विभागातील दुकानांमध्ये अचानक जाउुन प्लास्टिक पिशव्या व एकल वापर प्लास्टिकची तपासणी केली. यामध्ये रॉयल फरसाण घणसोली, दिनेश फरसाण घणसोली व शिवशक्ती मार्ट घणसोली या तीन दुकानांमध्ये प्लास्टिक पिशव्या आढळून आल्याने त्यांच्या कडून प्रत्येकी 5 हजार या प्रमाणे एकूण 15 हजार दंडात्मक रक्कम वसूल करण्यात आली. त्यासोबतच 30 किलो प्लास्टिक पिशव्यांचा साठा जप्त करण्यात आला.
प्लास्टिकमुळे मानवी जीवनाला व पर्यावरणाला मोठया प्रमाणावर हानी पोहचत असून नागरिकांनी आपल्या दैनंदिन वापरातून एकल वापर प्लास्टिकला हद्दपार करावे. त्याकरिता कापडी पिशव्यांचा पर्याय स्विकारावा असे आवाहन करित व्यावसायिकांनीही प्लास्टिक पिशव्या व एकल वापर प्लास्टिक दुकाने / कार्यालये याठिकाणी ठेवू नये असे सूचित करण्यात येत आहे.000000
