राष्ट्रीय बाल स्वास्थ्य कार्यक्रमाचा 1 मार्च रोजी शुभारंभ
आरोग्य प्रतिनिधी- सातारा राष्ट्रीय बाल स्वास्थ्य कार्यक्रम मोहिम स्वरुपात राबविण्यात येणार आहे. या मोहिमेचा शुभारंभ पालकमंत्री शंभूराज देसाई यांच्या अध्यक्षतेखाली व लोकप्रतिनिधीच्या उपस्थितीत जिजामाता प्रॅक्टिसिंग स्कूल सातारा येथे होणार आहे, अशी माहिती जिल्हा शल्यचिकित्सक डॉ.युवराज करपे यांनी दिली आहे.
० ते १८ वर्षे पर्यतच्या बालकांची / किशोरवयीन मुला-मुलींची प्राथमिक आरोग्य तपासणी करणे. आजारी आढळलेल्या बालकांवर त्वरित उपचार करणे. गरजु आजारी बालकांना संदर्भसेवा जसे की, औषधोपचार, शस्त्रक्रीया देऊन उपचार करणे. प्रतिबंधात्मक आरोग्य सुविधा पुरविणे. सुरक्षित व सुदृढ आरोग्यासाठी समुपदेशन करणे. हा या कार्यक्रमाचा उद्देश आहे.
या मोहिमेच्या तपासणी पथकामध्ये पुरुष व महिला वैदयकीय अधिकारी, औषध निर्माण अधिकारी, ए.एन.एम यांचा सामावेश आहे. तपासणी मध्ये उच्चस्तरीय उपचार व शस्त्रक्रीया आवश्यक असलेल्या बालकांना शासकीय वैदयकीय महाविद्यालय, मनपा रुग्णालय, महात्मा जोतिबा फुले जनआरोग्य योजनेतंर्गत करारबध्द रुग्णालय व आरबीएसके करारबध्द रुग्णालया मध्ये संदर्भीत करण्यात येणार आहे.
शुभारंभ प्रसंगी जिल्हाधिकारी संतोष पाटील, मुख्य कार्यकारी अधिकारी याशनी नागराजन, जिल्हा आरोग्य अधिकारी डॉ. महेश खलीपे आदी उपस्थित राहणार आहेत
0000
