पैठण तालुक्यातील शेतरस्त्यांच्या प्रकरणांची दि.७,१५ व २१ रोजी सुनावणी…
छत्रपती संभाजीनगर, प्रतिनिधी- पैठण तालुक्यातील शेतरस्त्याच्या प्रकरणांची अंतिम सुनावणी सोमवार दि.७, मंगळवार दि.१५ व सोमवार दि.२१ रोजी दुपारी २ वाजता पैठण तहसील कार्यालयात होणार आहे,असे पैठणच्या उपविभागीय अधिकारी निलम बाफना यांनी कळविले आहे. यासंदर्भात महाराष्ट्र जमीन महसूल अधिनियम १९६६ अंतर्गत दाखल झालेल्या रस्ता प्रकरणांवर तातडीने सुनावणी घेण्याचे आदेश प्रशासनाला देण्यात आले आहेत. मुख्यमंत्र्यांच्या १०० दिवसांच्या कार्ययोजनेंतर्गत नागरी सुविधा सुधारण्याच्या उद्देशाने हा निर्णय घेतला गेला आहे. विशेषतः, शेतकऱ्यांना शेतीकामासाठी रस्त्यांची नितांत गरज असते. त्यामुळे शेती हंगामाच्या सुरुवातीला शेतकऱ्यांसाठी रस्त्यांची सोय व्हावी, यासाठी प्रशासनाने लवकरात लवकर मार्ग काढावा, असे निर्देश देण्यात आले आहेत. जून महिन्यात शेती मशागतीच्या कामाकरीता शेतकऱ्यांना रस्त्याची आवश्यकता असल्याने दाखल रस्ता प्रकरणात जलद गतीने सुनावणी घेऊन रस्ताचे प्रकरण त्वरीत निकाली काढण्याकरीता रस्ता प्रकरणात तहसिल कार्यालय पैठण येथे दि.७, दि.१५ एप्रिल व अंतिम सुनावणी दि.२१ एप्रिल रोजी दुपारी २ वा. रोजी घेण्यात येणार आहे. शेतकऱ्यांना रस्ते मोकळे करणे, उपलब्ध करुण देणे ही त्यांच्या जिव्हाळयाची बाब असल्यामुळे ही प्रकरणे मोहिम स्वरुपात निकाली काढण्यात येणार आहे, याची संबंधित शेतकरी तसेच संबंधित प्रकरणातील वकिलांनी नोंद घ्यावी, असे पैठणच्या उपविभागीय अधिकारी निलम बाफना यांनी कळविले आहे.
०००००
