वैभवशाली इतिहासाची साक्ष देणाऱ्या पुण्यश्लोक अहिल्यादेवी होळकर स्मारकासाठी राज्यशासन सर्वतोपरी सहकार्य करेल वस्त्रोद्योग मंत्री संजय सावकारे यांची ग्वाही
मुंबई, प्रतिनिधी- पुण्यश्लोक अहिल्यादेवी होळकर यांच्या त्रिशताब्दी जयंती वर्षानिमित्त महाराष्ट्रात विविध सांस्कृतिक आणि सामाजिक उपक्रमांचे आयोजन केले जात आहे. याच पार्श्वभूमीवर, जालना शहरात पुण्यश्लोक अहिल्यादेवी होळकर यांचे स्मारक उभारण्यात येत आहे .या स्मारकामुळे जालना शहर पर्यटन आणि सांस्कृतिक केंद्र म्हणूनही ओळखले जाईल, या स्मारकासाठी शासन स्तरावर सर्वतोपरी सहकार्य केले जाईल अशी ग्वाही वस्त्रोद्योग मंत्री संजय सावकारे यांनी दिली.
जालन शहरातील अंबड चौफुली परिसरात उभारण्यात येत असलेल्या ‘हिंदूधर्मरक्षिका महाराणी पुण्यश्लोक अहिल्यादेवी होळकर स्मारकाची वस्त्रोद्योग मंत्री संजय सावकारे यांनी पाहणी केली. या प्रसंगी आमदार नारायण कुचे, भास्कर आबा दानवे, बद्रीनाथ पठाडे, भगवान मात्रे, स्मारक समितीचे अध्यक्ष कपील दहेकर, सचिव शांतीलाल बनसोडे, कोषाध्यक्ष बालासाहेब अबुज, सदस्य तुकाराम कोल्हे, एस. एस. दहेकर, प्रा. गणेश गुंजाळ, साहित्यिक पंडित तळेगावकर, कुरधने सर, काळे साहेब यांच्यासह विविध समाजबांधव मोठ्या संख्येने उपस्थित होते.
मंत्री संजय सावकारे म्हणाले, जालना शहराचा सांस्कृतिक आणि ऐतिहासिक वारसा समृद्ध करणारे २४ फूट उंचीचे हे स्मारक देशातील सर्वात उंच अहिल्यादेवी होळकर स्मारक ठरणार असून वैभवशाली इतिहासाची साक्ष देणारे आहे या स्मारकाच्या पार्श्वभूमीला ऐतिहासिक महेश्वर किल्ला आणि इंदूर राजवाड्याच्या संकल्पनेचा मिलाफ साधणारी २८ फूट उंच आणि ५६ फूट रुंद दगडी भिंत उभारली जाणार आहे. ही भिंत स्मारकाचे विशेष आकर्षण ठरणार आहे. या भव्य प्रकल्पासाठी आणि सुशोभीकरणासाठी शासन सकारात्मक असून सर्वतोपरी सहकार्य करेल.
स्मारक समितीचे अध्यक्ष कपील दहेकर म्हणाले,हे स्मारक अहिल्यादेवींच्या कार्याचा आणि त्यांच्या समाजसुधारणेच्या विचारांचा गौरव आहे. यामुळे जालना शहराचे सांस्कृतिक वैभव वाढेल आणि भावी पिढ्यांना प्रेरणा मिळेल.
दरम्यान जालना जिल्ह्यात तिरंगा यात्रा समारोप आणि माजी सैनिकांचा सत्कार कार्यक्रमवस्त्रोद्योगमंत्री संजय सावकारे यांच्या उपस्थितीत पार पडला.
-*-*-*-*-*-
