६० कोटींची सायबर फसवणूक करणारी आंतरराष्ट्रीय टोळी गजाआड!
मुंबई प्रतिनिधी- खातेधारकांना पैसे देऊन त्याबदल्यात त्यांचे नावे असलेले बँक खाते आणि सिम कार्ड वापरण्यास घेणाऱ्या व त्याचा वापर करून नागरिकांची सायबर फसवणूक करणाऱ्या आंतरराष्ट्रीय टोळीचा गुन्हे शाखा कक्ष-२ यांनी पर्दाफाश केला आहे.
तपासात एकूण ९४३ बँक खाती वापरल्याचे समोर आले असून त्यापैकी १८१ खाती मुंबईत सायबर फसवणुकीसाठी सक्रिय असल्याचे निष्पन्न झाले आहे. आतापर्यंत १२ आरोपींना अटक केली असून त्यांच्या ताब्यातून २ लॅपटॉप, २५ मोबाईल फोन, २५ पासबुक, ३० चेकबुक, ४६ एटीएम कार्ड व १०४ सिमकार्ड जप्त करण्यात आले आहेत.
सायबर कंट्रोल रूम तसेच सायबर हेल्पलाईन १९३० वर आलेल्या तक्रारींवरून हे स्पष्ट झाले की नागरिकांची डिजिटल अरेस्ट, बनावट ऑनलाईन शॉपिंग व फसव्या शेअर ट्रेडिंग स्कीमद्वारे फसवणूक करण्यात आली होती.
