ई-पीक पाहणीसाठी 30 सप्टेंबरपर्यंत मुदतवाढ 61.79% ई पीक पाहणीची नोंदणी ई पीक पाहणी -डीसीएस ॲपव्दारे करा नोंदणीØ तलाठी, कोतवाल, सहायक शेतकऱ्यांच्या मदतीलाØ सातबारावर पीक नोंदणी आवश्यक
बुलढाणा, द प्रतिनिधी : राज्य शासनाच्या महत्वाकांक्षी प्रकल्प ई पीक पाहणी – डीसीएस ची 1 ऑगस्टपासून सुरुवात झाली असून शेतकरी स्तरावरील ई-पीक पाहणी करण्यासाठी 30 सप्टेंबर 2025 अंतिम मुदत देण्यात आली आहे. शतकऱ्यांनी आपल्या सातबारावर पीक पेरा स्वतः ई पीक पाहणीव्दारे नोंदणी करण्याचे आवाहन जिल्हाधिकारी डॉ. किरण पाटील यांनी केले आहे.
खरीप हंगाम 2025 ई-पीक पाहणी डिजिटल क्रॉप सर्वे अंतर्गत बुलढाणा जिल्ह्यात आजपर्यंत 463380.47 हे. आर एवढ्या क्षेत्रावर, तसेच एकूण 836037 पीक पाहणी करावयाच्या मालकी प्लॉटपैकी 479683 प्लॉटवर संबंधित शेतकऱ्यांनी आपल्या पिकांची ई पीक पाहणी डीसीएस व्हर्जन 4.0.0 या मोबाईल अॅपद्वारे आपल्या सातबारावर नोंदणी केलेली आहे. आजवर जिल्ह्यात डिजिटल क्रॉप सर्वे अंतर्गत ई पीक पाहणीची नोंदणी 61.79% क्षेत्रावर झालेली आहे. उर्वरित क्षेत्रावर सर्व शेतकरी बांधवांना ई-पीक पाहणी अॅपव्दारे पीकांची नोंदणी करण्याचे आवाहन करण्यात आले आहे.या पीक पाहणीची नोंदणी ई-पीक पाहणी व्हर्जन 4.0.0 या मोबाईल अपव्दारे करतांना अॅन्ड्रॉईड फोन आवश्यक आहे. हा अप गुगल क्रोम अपडेट करून मोबाईलमध्ये इन्स्टॉल करून घ्यावे. ई-पीक पाहणी अॅपव्दारे शेत बांधावर जावून पीकांची नोंदणी करून माहिती अपलोड करावी. या कामी संबंधित शेतकऱ्यांजवळ मोबाईल उपलब्ध नसल्यास अथवा हाताळता येत नसल्यास, संबंधित गावाचे तलाठी. कोतवाल तसेच संबंधित गावात नियुक्त केलेले सहायक यांची मदत घेवून आपल्या पिकांची नोंदणी ई-पीक पाहणी अॅपव्दारे करून घेण्यात यावी. या अॅपविषयी काही अडचण असल्यास संबंधित गावाचे तलाठी तसेच कॉमन सर्व्हिस सेंटर, आपल्या गावातील डीसीएस करिता नियुक्त सहाय्यक यांची मदत घ्यावी.
ई-पीक पाहणीव्दारे पीकांची नोंदणी न केल्यास आपल्या सातबारावर पीक पेरा कोरा राहील. जो नंतर भरता येत नाही त्यामूळे पीक विमा, व इतर शासकीय अनुदान व लाभ मिळविण्यास अडचण निर्माण होईल. अवेळी पाऊस किंवा इतर नैसर्गिक आपत्ती याबाबत पीक विमा मिळण्यासाठी सातबारावर अचूक पीक नोंद असणे आवश्यक आहे. त्याअनुषंगाने सर्व शेतकरी बांधवांनी 30 सप्टेंबर 2025 पूर्वी आपल्या पिकांची नोंदणी करून घ्यावी, असे आवाहन जिल्हाधिकारी डॉ. किरण पाटील यांनी केले आहे.
00000
