जुलै 2025 मधील नमुंमपा पदभरती परीक्षेच्या निकालाचा मार्ग मा.उच्च न्यायालयाच्या आदेशाने खुला30 संवर्गाचे स्कोअर कार्ड 11 सप्टेंबरला होणार महापालिका संकेतस्थळावर जाहीर,सद्यस्थितीत करार पध्दतीने कार्यरत कर्मचा-यांची पदे वगळून उर्वरित पदांवर देता येणार नेमणुका
नवी मुंबई प्रतिनिधी नवी मुंबई महानगरपालिकेच्या नियमीत आस्थापनेवरील गट-क व गट-ड मधील पदे सरळसेवेने भरणेकरीता जाहिरात क्रमांक आस्था/01/2025, दिनांक 27/03/2025 रोजी प्रसिध्द करण्यात आली होती. तसेच त्यामधील कनिष्ठ अभियंता (स्थापत्य), (गट-क), वेतनश्रेणी एस -14: 38600-122800 या संवर्गाच्या पदसंख्येत वाढ झाल्याने जाहिरातीमध्ये दर्शविलेल्या या पदांच्या सामाजिक व समांतर आरक्षण यामध्ये बदल करण्यात आल्याचे शुध्दीपत्रक दि.29/04/2025 रोजी प्रसिध्द करण्यात आले होते.
त्यानुसार सदर एकूण 30 संवर्गातील 668 पदे भरण्याबाबतच्या जाहिरातीस अनुसरून दि. 19 मे 2025 अखेर एकूण 30 संवर्गातील 668 पदांकरिता 84,774 उमेदवारांचे अर्ज प्राप्त झाले होते. त्यांची टी.सी.एस. आयओएन या संस्थेमार्फत 28 परीक्षा केंद्रावर दि.16, 17, 18 व 19 जुलै 2025 रोजी वस्तुनिष्ठ बहुपर्यायी ऑनलाईन परीक्षा घेण्यात आली होती. या परीक्षेस 68149 उमेदवार उपस्थित होते.
मात्र नवी मुंबई महानगरपालिका आस्थापनेवर सद्यस्थितीत करार पध्दतीने कार्यरत कर्मचा-यांनी सरळसेवा पदभरती 2025 विरूध्द मा.उच्च न्यायालय, मुंबई येथे रिट याचिका क्र.4932/2025 दाखल केली होती. सदर याचिकेच्या अनुषंगाने मा.उच्च न्यायालयाने परीक्षेचे स्कोअर – कार्ड प्रसिध्द न करणेबाबत दि.25 ऑगस्ट 2025 अन्वये निर्देश दिले होते. आता या संदर्भात मा.उच्च न्यायालय, मुंबई यांनी दि.19 ऑगस्ट 2026 रोजीच्या आदेशान्वये रिट याचिका क्रमांक 4932/2025 मधील अंतरिम अर्ज (एसटी) क्रमांक 21054/2026 निकाली काढून पुढीलप्रमाणे निर्देश दिले आहेत.
मा.उच्च न्यायालयाचे उपरोक्त आदेश क्र.1 व 2 विचारात घेता जाहिरात क्र. आस्था/01/2025, दिनांक 27/03/2025 व शुध्दीपत्रक दि.29/04/2025 अन्वये प्रसिध्द केलेल्या पदभरतीच्या जाहिरातीमधील 30 संवर्गातील 668 पदांचा निकाल घोषित करण्यास मुभा देण्यात आली आहे.
मात्र महानगरपालिकेत करार पध्दतीवर कार्यरत 477 कर्मचारी यांच्या सेवेस कोणतीही बाधा पोहचविता येणार नाही असेही आदेश देण्यात आले आहेत. त्यामुळे महानगरपालिकेत ज्या पदांवर करार पध्दतीने कर्मचारी कार्यरत आहेत तेवढी पदे वगळून फक्त उर्वरीत पदांवर नेमणुका करण्यात येतील, याची सर्व परीक्षार्थींनी नोंद घ्यावयाची आहे.
तसेच, मा.न्यायालयातील प्रलंबित प्रकरणी अंतिम निर्णय झाल्यानंतर उर्वरीत पदांवर नेमणूक देण्याबाबत निर्णय घेण्यात येईल याची सर्व परीक्षार्थींनी नोंद घ्यावयाची आहे.
जाहिरात क्रमांक आस्था/01/2025, दिनांक 27/03/2025 आणि शुध्दीपत्रक दि.29/04/2025 अन्वये प्रसिध्द केलेल्या पदभरतीच्या जाहिरातीमधील संवर्गात सध्या नवी मुंबई महानगरपालिकेत करार पध्दतीने कार्यरत असलेल्या कर्मचा-यांचा तपशील महानगरपालिकेचे संकेतस्थळ www.nmmc.gov.in यावर प्रसिध्द करण्यात आलेला आहे.
या अनुषंगाने नवी मुंबई महानगरपालिकेच्या जाहिरात क्रमांक आस्था/01/2025, दिनांक 27/03/2025 व शुध्दीपत्रक दि.29/04/2025 अन्वये प्रसिध्द केलेल्या पदभरती जाहिरातीमधील 30 संवर्गाचा स्कोअर-कार्ड नवी मुंबई महानगरपालिकेचे अधिकृत संकेतस्थळ www.nmmc.gov.in वर दि.11/09/2026 रोजी प्रसिध्द करण्यात येणार आहे. मात्र नेमणुका या उपलब्ध पदांच्या मर्यादेतच करण्यात येतील याची सर्व उमेदवारांनी नोंद घ्यावी असे महापालिका आयुक्त डॉ.कैलास शिंदे यांनी सूचित केले आहे.
