चार नवीन कामगार संहितांबाबत ‘सेवा सप्ताह’ अंतर्गत जनजागृती कार्यक्रम३० सप्टेंबर रोजी वाळूज येथे आयोजन; संबंधित घटकांनी सहभागी होण्याचे आवाहन
छत्रपती संभाजीनगर, प्रतिनिधी : केंद्र शासनाच्या श्रम व रोजगार मंत्रालयाच्या मार्गदर्शनाखाली नवीन चार कामगार संहितांबाबत जनजागृती, प्रबोधन व क्षमता बांधणीसाठी विशेष उपक्रम राबविण्यात येत आहेत. त्याअनुषंगाने छत्रपती संभाजीनगर जिल्ह्यात बुधवार, दि. ३० सप्टेंबर रोजी ‘सेवा सप्ताह’ अंतर्गत विशेष जनजागृती व प्रबोधन कार्यक्रमाचे आयोजन करण्यात आले आहे, अशी माहिती कामगार उपआयुक्त नि. पां. पाटणकर यांनी दिली.
जिल्हाधिकारी तथा जिल्हादंडाधिकारी यांच्या मार्गदर्शनाखाली जिल्हा प्रशासन, कामगार विभाग व संबंधित विभागांच्या समन्वयाने या कार्यक्रमाचे आयोजन करण्यात येणार आहे. नवीन कामगार संहितांमधील तरतुदी व त्यांची अंमलबजावणी, नियोक्ते व कामगारांची भूमिका व जबाबदाऱ्या, अनुपालन प्रक्रिया तसेच रोजगार व सामाजिक सुरक्षा योजनांबाबत संबंधित घटकांना माहिती व मार्गदर्शन देणे हा कार्यक्रमाचा प्रमुख उद्देश आहे.
कार्यक्रमात वेतन संहिता, २०१९; औद्योगिक संबंध संहिता, २०२०; व्यावसायिक सुरक्षा, आरोग्य व कामाच्या परिस्थितीची संहिता, २०२० आणि सामाजिक सुरक्षा संहिता, २०२० याबाबत सविस्तर मार्गदर्शन करण्यात येणार आहे. तसेच नियोक्ते व कामगारांच्या शंका व अडचणींचे निराकरण करण्यासाठी मार्गदर्शन केले जाणार आहे.
केंद्र शासनाच्या व्यापक जनजागृती उपक्रमांतर्गत चार नवीन कामगार संहितांसह PM-VBRY आणि PM-SYM या रोजगार व सामाजिक सुरक्षा योजनांबाबतही जनजागृती करण्यात येणार आहे.हा कार्यक्रम दि. ३० सप्टेंबर रोजी सकाळी ९.३० ते दुपारी २ या वेळेत MASSIA, अनिल विश्वासराव चव्हाण सभागृह, पी-१५, मोरे चौक, एमआयडीसी वाळूज, छत्रपती संभाजीनगर येथे आयोजित करण्यात आला आहे.
जिल्ह्यातील संबंधित शासकीय यंत्रणा, उद्योग व औद्योगिक संघटना, कामगार कायदे तज्ज्ञ, एचआर फोरम्स, नियोक्ता प्रतिनिधी, वित्त क्षेत्रातील व्यावसायिक, सनदी लेखापाल, जिल्हा उद्योग केंद्र तसेच अन्य संबंधित घटकांनी या कार्यक्रमात सक्रिय सहभाग नोंदवावा, असे आवाहन जिल्हा प्रशासन व कामगार विभागाच्या वतीने करण्यात आले आहे.
