तहानलेल्या गावांच्या मदतीला धावले सतीश घाटगे दुष्काळग्रस्त गावासाठी समृध्दी कारखान्याने सुरु केले दहा टँकर
राज्य प्रतिनिधी
घनसावंगी: अंबड , घनसावंगी तालुक्यात अपुऱ्या पावसामुळे अनेक गावात तीव्र पाणी टंचाई निर्माण झाली आहे. टंचाईग्रस्त गावांना पाणीपुरवठा करण्यासाठी प्रशासनाकडून अद्यापही हालचाली सुरू न झाल्याने समृध्दी कारखान्याचे चेअरमन सतीश घाटगे यांनी समृध्दी कारखान्यामार्फत गुरुवारी दहा पाण्याचे टँकर सुरू केले. यामुळे टंचाईग्रस्त गावांना मोठा दिलासा मिळाला आहे. या मदतीबद्दल गावकऱ्यांनी सतीश घाटगे यांचे आभार मानले.
मार्च महिन्याच्या सुरुवातीला घनसावंगी मतदारसंघात अनेक गावांत पाणी टंचाई निर्माण झाली आहे. अनेक ग्रामपंचायतीनी पाणी टँकर सुरु करण्याची मागणी पंचायत समिती कार्यालयात केली आहे. परंतु, अद्याप गावात टँकर सोडण्यासाठी हालचाली सुरू झाल्या नाही. तहानलेल्या गावकऱ्यांची तहान भागविण्यासाठी भाजप नेते सतीश घाटगे यांनी प्रशासनावर अवलंबून न राहता स्वतः पुढाकार घेऊन समृध्दी साखर कारखान्यामार्फत दहा टँकर सुरू केले. पाणी टंचाई निर्माण झालेल्या सिध्देश्वर पिंपळगाव व बाचेगाव येथे गुरुवारी त्यांनी टँकर सुरु केले.कारखान्यामार्फत पाण्याचे टँकर गावात आल्यानंतर गावकऱ्यांनी आनंद व्यक्त केला.विशेष करून महिलांनी सतीश घाटगे यांचे आभार मानले.
…
कोट
तहानलेल्या प्रत्येक गावाला करणार मदत
उन्हाळ्याच्या दिवसात पाण्यासाठी महिलांना पायपीट करावी लागते. यात लहान मुले -मुलींची देखील धावपळ होते. सामाजिक बांधिलकी म्हणून समृध्दी कारखान्यामार्फत हे टँकर सुरू केले आहे.घनसावंगी मतदारसंघातील ज्या गावात पाणी टंचाई निर्माण झाली आहे ,अशा गावातील गावकऱ्यांनी माझ्या जनसेवा कार्यालयास टँकर सुरू करण्यासाठी अर्ज करावा.
सतीश घाटगे, भाजप नेते, तथा चेअरमन समृद्धी साखर कारखाना
