महसूल मंत्री चंद्रशेखर बावनकुळे यांच्या हस्ते जिल्ह्यातील दोन भू-प्रणाम केंद्रांचे दूरदृश्यप्रणालीद्वारे उद्घाटन…
सांगली, प्रतिनिधी : भूमि अभिलेख विभागांतर्गत सांगली जिल्ह्यात नगर भूमापन अधिकारी कार्यालय, सांगली व उप अधीक्षक भूमि अभिलेख, कडेगाव या ठिकाणी सुसज्ज व अत्याधुनिक सोयीसुविधांनी युक्त भू-प्रणाम केंद्रांचे उद्घाटन महसूल मंत्री चंद्रशेखर बावनकुळे यांच्या हस्ते दूरदृश्यप्रणालीद्वारे आज करण्यात आले. या कार्यक्रमास भू-प्रणाम केंद्रामध्ये जिल्हा अधीक्षक भूमि अभिलेख सुरेखा सेठिया, नगर भूमापन अधिकारी सुवर्णा मसणे व जिल्ह्यातील सर्व उप अधीक्षक, कर्मचारी व कर्मचारी संघटनेचे पदाधिकारी उपस्थित होते.
जनतेसाठी भूमि अभिलेख विभागामार्फत दिल्या जाणाऱ्या विविध सेवा भू-प्रणाम केंद्रातून उपलब्ध होणार आहेत. याचा अधिकाधिक जनतेने लाभ घ्यावा, असे आवाहन जिल्हा अधीक्षक भूमि अभिलेख सुरेखा सेठिया यांनी यावेळी केले. नगर भूमापन अधिकारी, सांगली व उप अधीक्षक भूमी अभिलेख कडेगाव येथील भू-प्रणाम केंद्रामध्ये जनतेस / अभ्यागतांसाठी सुसज्ज बैठक व्यवस्था, पिण्याच्या पाण्याची सोय व प्रतिक्षालय याची सोय करण्यात आली असून त्यामुळे कार्यालयात येणाऱ्या अभ्यागतांसाठी उत्तम दर्जाची सुविधा उपलब्ध झालेल्या आहेत.
भू-प्रणाम केंद्रांची संकल्पना,भूमि अभिलेख विभागाची वाटचाल आधुनिकीकरणाकडे होत असून त्याचाच एक भाग म्हणून राज्यात दोन टप्प्यामध्ये एकूण ३० भू-प्रणाम केंद्रे स्थापित करण्यात आली आहेत. महाराष्ट्र राज्य भूमि अभिलेख जमाबंदी आयुक्त आणि संचालक डॉ. सुहास दिवसे यांच्या संकल्पनेतून व पुणे विभागाचे भूमि अभिलेख उपसंचालक राजेंद्र गोळे यांच्या मार्गदर्शनातून भू-प्रणाम केंद्र कार्यान्वित करण्यात आले आहेत. या केंद्रामध्ये भूमि अभिलेख विभागामार्फत विविध सेवा अंतर्गत संगणकीकृत मिळकत पत्रिका, मिळकत पत्रिकेवरील फेरफार, सर्व प्रकारच्या फेरफारासाठी अर्ज, ई मोजणी व्हर्जन २.० मधील सर्व प्रकारचे मोजणी नकाशे, मिळकतीचे डिजिटल साईन केलेले सर्व प्रकारचे नकाशे इत्यादी सेवा उपलब्ध करून देण्यात आल्या आहेत. EPCIS प्रकल्पांतर्गत फेरफार नोंदवहीचा उतारा, परिशिष्ठ अ, परिशिष्ठ ब, नमुना नंबर ९ ची नोटीस , नमुना नंबर १२ ची नोटीस, अर्जाची पोच, रिजेक्शन पत्र, त्रुटी पत्र, निकाली पत्र, विवादग्रस्त नोंदवही उतारा, सर्व प्रकारच्या अपिल निर्णयाच्या प्रती व इतर संगणकीकृत अभिलेख उपलब्ध करून दिलेले आहेत. त्याचे दरही निश्चित करण्यात आले असल्याचे नगर भूमापन अधिकारी सुवर्णा मसणे यांनी प्रसिध्दीपत्रकाव्दारे कळविले आहे.
00000
