उच्चस्तरीय सुरक्षा आढावा बैठकीत सात पर्यटनस्थळे पुन्हा सुरु करण्याचा निर्णय,
जम्मू-काश्मीरमधील पर्यटनस्थळे पर्यटकांसाठी सुरु
राज्य प्रतिनिधी-जम्मू-काश्मीरला देश-विदेशातून दरवर्षी लाखो पर्यटक भेट देतात. नैसर्गिक सौंदर्य, डोंगररांगा आणि बर्फाच्छादित प्रदेशामुळे या भागाचे आकर्षण कायम आहे. परंतु एप्रिल महिन्यात पहलगाम परिसरात झालेल्या दहशतवादी हल्ल्यानंतर सुरक्षेच्या कारणास्तव अनेक महत्त्वाची पर्यटनस्थळे बंद करण्यात आली होती. या निर्णयामुळे पर्यटकांचा ओघ कमी झाला आणि स्थानिक अर्थव्यवस्थेला फटका बसला.
मनोज सिन्हा यांच्या अध्यक्षतेखाली झालेल्या उच्चस्तरीय सुरक्षा आढावा बैठकीत सात पर्यटनस्थळे पुन्हा सुरु करण्याचा निर्णय घेण्यात आला. यामध्ये अरु व्हॅली, राफ्टिंग पॉईंट यान्नर, अक्कड पार्क, पादशाही पार्क आणि कमान पोस्ट यांचा समावेश आहे. तसेच जम्मू विभागातील दागन टॉप, कठुआमधील धग्गर, सलालमधील शिव गुहा आणि रियासीतील पर्यटन स्थळे पर्यटकांसाठी खुली करण्यात आली आहेत. सुरक्षेची खात्री करूनच हा निर्णय घेतल्याचे प्रशासनाने स्पष्ट केले.
पर्यटकांच्या सुरक्षिततेसाठी सैन्य आणि स्थानिक पोलिसांकडून काटेकोर व्यवस्था करण्यात आली आहे. संवेदनशील भागांमध्ये सुरक्षा तुकड्या वाढविण्यात आल्या आहेत. पर्यटकांना ठराविक मार्गानेच प्रवास करण्याचे आणि सुरक्षेचे नियम पाळण्याचे निर्देश दिले गेले आहेत. प्रशासनाचे म्हणणे आहे की, नागरिक आणि पर्यटकांची सुरक्षितता हीच प्राथमिकता आहे.
पर्यटन पुन्हा सुरु झाल्याने हॉटेल व्यवसायिक, मार्गदर्शक, टॅक्सी चालक आणि स्थानिक व्यापाऱ्यांमध्ये आनंदाचे वातावरण आहे. गेल्या काही महिन्यांपासून रोजगार आणि उत्पन्नात मोठी घट झाली होती. पर्यटन खुलं झाल्याने स्थानिक अर्थव्यवस्था पुन्हा गती पकडेल, असा विश्वास व्यक्त केला जात आहे.
उन्हाळ्यात काश्मीरमध्ये पर्यटकांचा मोठा ओघ असतो. त्यामुळे या निर्णयाचा थेट फायदा पर्यटनप्रेमींना होणार आहे. पर्यटन खुलं झाल्यानंतर पुन्हा मोठ्या प्रमाणावर पर्यटक आकर्षित होतील, अशी अपेक्षा आहे.
0000
0
