सैनिक कल्याण पुणे विभागात माजी सैनिकांसाठी लिपिक-टंकलेखक पदांची भरती…
छत्रपती संभाजीनगर, प्रतिनिधी) – सैनिक कल्याण विभाग तसेच त्याच्या अधिपत्याखालील जिल्हा सैनिक कल्याण कार्यालयांमध्ये लिपिक-टंकलेखक (गट–क) या एकूण ७२ पदांच्या भरतीसाठी फक्त माजी सैनिक उमेदवारांकडून ऑनलाईन अर्ज मागविण्यात आले आहेत.
या पदांपैकी एक पद दिव्यांग संवर्गासाठी राखीव असून, किमान ४० टक्के दिव्यांगत्व असलेल्या उमेदवारांपैकी दिव्यांगत्वाच्या प्रकारानुसार कर्तव्ये व जबाबदारी विचारात घेऊन, गुणवत्ता व उपलब्धतेनुसार नियुक्ती करण्यात येणार आहे.या भरती प्रक्रियेचे आयोजन टिसीएस–आयओएन (TCS–iON) या संस्थेमार्फत करण्यात येणार आहे. अर्ज फक्त ऑनलाईन पद्धतीनेच स्वीकृत केले जाणार असून, इतर कोणत्याही माध्यमातून प्राप्त अर्ज ग्राह्य धरले जाणार नाहीत.
पात्र उमेदवारांनी आपले ऑनलाईन अर्ज www.mahasainik.maharashtra.gov.in या संकेतस्थळावर दि.१४ ऑक्टोबर रोजी सकाळी ११ ते दि.५ नोव्हेंबर रोजी रात्री ११.५९ वाजेपर्यंत सादर करणे आवश्यक आहे. त्यानंतर संकेतस्थळावरील लिंक बंद करण्यात येईल,असे आवाहन जिल्हा सैनिक कल्याण अधिकारी केले आहे.
०००००
