औरंगाबाद : मुंबईपाठोपाठ आता औरंगाबादमध्येही भाजप आणि शिवसेनेमध्ये  श्रेयवादावरून कुरघोडी सुरू होणार असल्याचं दिसत आहे. केंद्रीय रेल्वे राज्यमंत्री रावसाहेब दानवे यांच्या आभाराचे तसंच ‘करून दाखवले’ चे होर्डिंग्ज भाजपचे गटनेते, माजी उपमहापौर प्रमोद राठोड यांनी शहरभर लावले आहेत.

जिल्हा परिषद आणि महानगरपालिका निवडणुकीच्या पार्श्वभूमीवर आता भाजपकडून श्रेय घ्यायला सुरुवात झाली आहे तर या होर्डिंगबाजीवर शिवसेना नेते, माजी खासदार चंद्रकांत खैरे यांनी टीका केलीय. रेल्वे प्रश्नासाठी गेल्या अनेक वर्षांपासून शिवसेनेकडून पाठपुरावा केला जात असल्याचं त्यांचं म्हणणं आहे. मुंबईतील 500 चौरस फुटापर्यंतच्या घरांचे मालमत्ता कर रद्द केल्यावरून भाजप आणि शिवसेनेमध्ये चांगलाच कलगीतुरा रंगला आहे.