राष्ट्रीय लोकअदालतीत १६३५ प्रकरणात १८ कोटींहून अधिक रकमेची तडजोड

 

      छत्रपती संभाजीनगर, प्रतिनिधी- जिल्हा व सत्र न्यायालयात शनिवारी (दि.१०) पार पडलेल्या लोकअदालतीत १८ कोटी ९५ लाख १७ हजार ९७७ रुपयांच्या रकमेचा समावेश असलेली १६३५ प्रकरणे तडजोडीने निकाली निघाली, अशी माहिती जिल्हा विधी सेवा प्राधिकरणाच्या सचिव श्रीमती वैशाली फडणीस यांनी दिली आहे.

 राष्ट्रीय विधी सेवा प्राधिकरण, राज्य विधी सेवा प्राधिकरण यांच्या आदेशानुसार जिल्हा विधी सेवा प्राधिकरणामार्फत जिल्हा सत्र न्यायालय येथे राष्ट्रीय लोक अदालतीचे आयोजन करण्यात आले होते. जिल्हा विधी सेवा प्राधिकरणाचे अध्यक्ष तथा प्रमुख व जिल्हा सत्र न्यायाधीश गिरिश अग्रवाल हे या लोकअदालतीच्या अध्यक्षस्थानी होते.

 या लोकअदालतीत मोटार अपघात, विद्युत चोरी, धनादेश अनादर, कौटुंबिक, भुसंपादन व तडजोडयुक्त दिवाणी व फौजदारी प्रकरणे, तसेच विविध बॅंकांची व वित्तीय संस्थांची वादपुर्व प्रकरणे ठेवण्यात आली होती.

 या लोकअदालतीत एकूण १५३० प्रलंबित व १०५ दाखलपूर्व असे १६३५ प्रकरणे तडजोडी ने निकाली काढण्यात आली. प्रलंबित प्रकरणांमध्ये १६ कोटी १४ लाख ७७ हजार ५१० रुपये तर वादपूर्व प्रकरणांमध्ये २ कोटी ८० लाख ४० हजार ४६७ रुपये असे एकूण १८ कोटी ९५ लाख १७ हजार ९७७ रुपये इतकी रक्कम तडजोडीने निकाली निघाली. या लोकअदालतीसाठी २९ पॅनेल तयार करण्यात आले होते.

०००००