जागतिक पर्यावरण दिनानिमित्त महापे येथे देशी वृक्षरोपांची लागवड

 

        नवी मुंबई प्रतिनिधी – जागतिक पर्यावरण दिनाचे औचित्य साधून नमुंमपा आयुक्त डॉ.कैलास शिंदे यांच्या मार्गदर्शनाखाली पर्यावरण विषयक विविध उपक्रमांचे आयोजन करण्यात आलेले असून यामध्ये लोकसहभागावर विशेष भर दिला जात आहे.  अशाच प्रकारचा एक अभिनव उपक्रम महापे येथे नमुंमपा परिमंडळ 2 विभागाच्या वतीने जीवन विद्या मिशन या संस्थेच्या सहयोगाने आयोजित करण्यात येऊन 90 देशी वृक्षरोपांची लागवड करण्यात आली.

  नवी मुंबईच्या जैवविविधतेत भर पडावी यादृष्टीने देशी वृक्षारोपांची लागवड करण्याचा निर्णय महापालिका आयुक्त डॉ.कैलास शिंदे यांच्या मार्गदर्शनाखाली घेण्यात आला असून त्यानुसार महापे येथे आंबा, वड, पिंपळ, फणस, लिंब अशा 90 देशी वृक्षारोपांची लागवड करण्यात आली. त्यासोबत 10 सुगंधी पुष्परोपांची लागवडही करण्यात आली.

  परिमंडळ 2 विभागाचे उपायुक्त डॉ.कैलास गायकवाड यांच्या पुढाकारातून, कोपरखैरणे विभागाचे सहाय्यक आयुक्त श्री.भरत धांडे व उद्यान सहाय्यक श्री.श्रीकांत जाधव यांच्या माध्यमातून, जीवन विद्या मिशन संस्थेच्या सहयोगाने हा उपक्रम यशस्वीरित्या संपन्न झाला. याप्रसंगी जीवन विद्या मिशनचे स्वयंसेवक व नागरिक मोठ्या संख्येने उपस्थित होते.

000000