२७ सप्टेंबर रोजी बुवाबाजीविरोधात डोंबिवलीत संघर्ष परिषद
ठाणे, प्रतिनिधी : फलज्योतिष, बुवाबाजी आणि चमत्कारांच्या नावाखाली होणारे शोषण, तसेच अंधश्रद्धेच्या माध्यमातून होणारी आर्थिक, मानसिक, लैंगिक आणि सामाजिक फसवणूक याविरोधात महाराष्ट्र अंधश्रद्धा निर्मूलन समिती, ठाणे जिल्ह्याच्या वतीने रविवार, दि. २७ सप्टेंबर २०२६ रोजी दुपारी ३ वाजता डोंबिवली पश्चिम रेल्वे स्थानकाजवळील जोंधळे विद्यासमूहाच्या सभागृहात ‘संघर्ष परिषद’ आयोजित करण्यात आली आहे.
या परिषदेचे उद्घाटन पुरोगामी विचारांचे लेखक साथी अभिजीत देशपांडे यांच्या हस्ते होणार आहे.परिषदेत ‘फलज्योतिष : एक थोतांड’ या विषयावर अंधश्रद्धा निर्मूलन पत्रिकेचे कार्यकारी संपादक उत्तम जोगदंड मार्गदर्शन करणार आहेत. तसेच ‘बुवाबाजीचे वाढते प्रकार’ या विषयावर बुवाबाजी संघर्ष विभागाच्या मेंटॉर साथी ॲड. रंजना पगार-गवांदे विचार मांडणार आहेत.
‘चमत्कारांचे प्रात्यक्षिक आणि त्याचा खुलासा’ या सत्रात महा-अंनिसचे राज्य कार्यवाह तथा प्रकाशन विभागाचे प्रमुख प्राचार्य मच्छिंद्रनाथ मुंडे चमत्कारांमागील दावे आणि त्यामागील वास्तव प्रात्यक्षिकांसह स्पष्ट करणार आहेत.अंधश्रद्धेच्या नावाखाली नागरिकांचे शोषण होऊ नये, तसेच संकटाच्या काळात भोंदूंच्या भूलथापांना बळी न पडता विज्ञान, वैद्यकीय उपचार आणि संविधानिक मूल्यांचा आधार घ्यावा, हा या परिषदेचा प्रमुख उद्देश आहे.
या संघर्ष परिषदेला नागरिकांनी मोठ्या संख्येने उपस्थित राहावे, असे आवाहन अंनिसचे प्रधान सचिव राजेश देवरुखकर यांनी केले आहे.
