पलूस नवोदय विद्यालयात प्रवेश अर्जासाठी 29 जुलैची मुदत..

            सांगली, प्रतिनिधी: सांगली जिल्ह्यातून जवाहर नवोदय विद्यालय, पलूस येथे प्रवेशासाठी नवोदय विद्यालय प्रवेश 2026 प्रक्रिया सुरू झाली आहे. येथे 80 जागा भरण्यात येणार आहेत. त्यासाठी प्रवेश परीक्षा शनिवार, दिनांक 13 डिसेंबर 2025 रोजी सकाळी 11.30 वाजता होणार आहे. जवाहर नवोदय विद्यालय निवड चाचणी परीक्षेसाठी ऑनलाईन प्रवेश अर्ज भरण्याची मुदत 29 जुलै 2025 पर्यंत आहे. सर्व पात्र विद्यार्थ्यांनी प्रवेश अर्ज मुदतीमध्ये भरावेत, असे आवाहन प्राचार्य अनिल कांबळे यांनी प्रसिध्दीपत्रकाव्दारे केले आहे.

   ऑनलाईन प्रवेश अर्ज भरण्यासाठी www.navodaya.gov.in/https://navodaya.gov.in या संकेतस्थळावर संपर्क साधावा. पात्र उमेदवार हा संबंधित जिल्ह्यातील असावा. ऑनलाईन अर्ज करताना ते इयत्ता 5 वी मध्ये शिकत असलेल्या शाळेच्या मुख्याध्यापकाकडून योग्यरित्या भरलेले प्रमाणपत्र ज्यावर स्वतःचे अलीकडील काळात काढलेले छायाचित्र, विद्यार्थ्यांची स्वाक्षरी, पालकांची स्वाक्षरी आणि मुख्याध्यापकाकडून प्रतिहस्ताक्षरित केलेले प्रमाणपत्र (jpg स्वरुपात 10kb-100kb प्रमाणात) ऑनलाईन अपलोड करावयाचे आहे. विद्यार्थ्यांचा जन्म हा 01 मे 2014 ते 31 जुलै 2016 दरम्यान झालेला असावा, असे प्रसिध्दी पत्रकात म्हटले आहे.

00000