पर्यटन संचालनालयाच्या नवीन योजनांमुळे देश-विदेशी पर्यटकांना आता शहरातही मिळणार “टुरीस्ट होम”….
सातारा प्रतिनिधी पर्यटन संचालनालयांतर्गत पर्यटन व्यवसायाला प्रोत्साहन देण्याकरीता विविध योजना राबविण्यात येतात. देश-विदेशातील पर्यटकांच्या निवास व्यवस्थेकरीता टुरीस्ट होम, होम स्टे, पर्यटन व्हिला, पर्यटक अर्पाटमेंट इत्यादी बाबतचे नोंदणी प्रमाणपत्र देण्यात येणार आहे. या योजनेचा लाभ घेण्याकरीता पर्यटन संचालनालय, पुणे विभागामार्फत नोंदणीसाठी अर्ज प्रक्रिया सुरु करण्यात आली आहे. या विभागातील नागरीकांनी तसेच पर्यटक व्यवसायिकांनी या योजनांचा जास्तीत जास्त लाभ घ्यावा असे आवाहन पुणे विभागाच्या प्र. उपसंचालक श्रीमती शमा पवार यांनी केले आहे.
पर्यटन संचालनालय, मुंबईचे संचालकांनी दिलेल्या निर्देशानुसार नव्याने चालू केलेल्या टुरीस्ट होम, होम स्टे, पर्यटन व्हिला, पर्यटक अर्पाटमेंट या योजनेच्या माध्यामातून व्यवसायाची संधी उपलब्ध करुन देण्यात आली आहे. देश-विदेशातून महाराष्ट्रात येणाऱ्या पर्यटकांना शहारातील जीवनशैली, संस्कृती आणि परंपरा यांना जवळून अनुभवता येणार आहे. तसेच स्थानिक स्वयंपाक, मराठमोळे पाहुणचार व कुटुंबातील गप्पा गोष्टींमुळे पर्यटकांचा प्रवास अधिक संस्मरणीय होईल. अधिक माहितीसाठी 8080035134 संपर्क क्रमांकावर सोमवार ते शुक्रवार कार्यालयीन वेळेत संपर्क साधण्याचे आवाहन केले आहे.
000
