दिव्यांगांप्रती संवेदनशीलता जागृती कार्यशाळेचा उपक्रम स्तुत्य- जिल्हाधिकारी अशोक काकडे- दिव्यांग व्यक्ती हक्क अधिनियमअन्वये कार्यशाळा उत्साहात

 सांगली, प्रतिनिधी.) : माणूस म्हणून आपल्या प्रत्येकाला हक्क आहे. तसेच दिव्यांगांनाही त्यांचे हक्क आहेत. त्यांना असलेल्या हक्कांची समाजामध्ये जनजागृती करण्यासाठी दिव्यांगांप्रती संवेदनशीलता जागृती कार्यशाळेचा उपक्रम हा अतिशय स्तुत्य आहे, असे प्रतिपादन जिल्हाधिकारी अशोक काकडे यांनी केले.  राज्य व केंद्र शासनाच्या सांगली जिल्ह्यातील सर्व कार्यालयातील वर्ग 1 व वर्ग 2 अधिकाऱ्यांचे दिव्यांग व्यक्ती हक्क अधिनियम अन्वये दिव्यांगांप्रती संवेदनशीलता जागृती कार्यशाळेच्या उद्‌घाटन प्रसंगी ते बोलत होते. मिरज येथील कै. रा. वि. भिडे मूकबधीर शाळेत आयोजित या कार्यशाळेस जिल्हा दिव्यांग सक्षमीकरण अधिकारी भारत निकम, जिल्हधिकारी महोदयांच्या सुविद्य पत्नी शरदिनी काकडे, संस्थेचे अध्यक्ष सुरेश आवटी यांच्यासह अधिकारी, कर्मचारी उपस्थित होते.

मा. दिव्यांग कल्याण आयुक्त यांच्या निर्देशानुसार जिल्ह्यातील वर्ग एक व वर्ग दोन अधिकारी व कर्मचारी यांच्याकरिता दिव्यांग व्यक्ती हक्क अधिनियम २०१६ कलम ३९ अन्वये दिव्यांगांप्रती संवेदनशीलता जागृती होण्यासाठी या एकदिवसीय कार्यशाळेचे आयोजन करण्यात आले होते. या कार्यशाळेमध्ये शिक्षण, पुनर्वसन, रोजगार व विविध योजनांच्या संबंधित चर्चा करण्यात येणार आहे. जिल्ह्यातील दिव्यांगांना अनेक पद्धतीने लाभ मिळवून देण्याकरिता जिल्हा दिव्यांग सक्षमीकरण कार्यालयाच्या वतीने सदर कार्यशाळेचे आयोजन करण्यात आले.

00000