यूपीआय व्यवहारांची मर्यादा दहा लाख रुपयांपर्यंत वाढवली
राज्य प्रतिनिधी-युनिफाइड पेमेंट्स इंटरफेस ही देशातील सर्वाधिक वापरली जाणारी डिजिटल पेमेंट प्रणाली आहे. या प्रणालीद्वारे होणाऱ्या व्यवहारांच्या मर्यादेत मोठा बदल करण्यात आला आहे. नॅशनल पेमेंट्स कॉर्पोरेशन ऑफ इंडियाने अर्थात एनपीसीआयने यूपीआय व्यवहारांची कमाल मर्यादा आता दहा लाख रुपये इतकी करण्याचा निर्णय घेतला आहे. हा बदल येत्या दिनांक पंधरा तारखेपासून लागू होणार आहे.
तथापि, व्यक्ती ते व्यक्ती व्यवहारांची मर्यादा पूर्वीप्रमाणेच एका दिवसाला एक लाख रुपये इतकीच राहणार आहे. इतर क्षेत्रांमध्ये मात्र मर्यादा वाढवण्यात आली आहे. भांडवली बाजार आणि विमा क्षेत्रात गुंतवणुकीसाठीची मर्यादा प्रति व्यवहार दोन लाखांवरून वाढवून पाच लाख रुपये करण्यात आली आहे. तसेच ई-मार्केटप्लेसवरील शासकीय व्यवहारांची मर्यादा देखील एक लाखांवरून पाच लाख रुपये करण्यात आली आहे.
याशिवाय, यूपीआयच्या माध्यमातून क्रेडिट कार्ड बिलांचा भरणा प्रति दिवस पाच लाख रुपयांपर्यंत करता येणार आहे. तर सोने-चांदी व दागिने खरेदीसाठी यापूर्वी एक लाख रुपयांची असलेली मर्यादा आता दोन लाख रुपये करण्यात आली आहे. या निर्णयामुळे उच्च मूल्याच्या डिजिटल व्यवहारांना गती मिळणार असून, नागरिकांना आणि व्यवसायिकांना आर्थिक व्यवहारात सुलभ करता येणार आहे
