लोकाभिमुख योजनामुळे एसटी महामंडळ प्रगती करीत आहे- पालकमंत्री डॉ. राधाकृष्ण विखे पाटील लोणी बस स्थानकात विकास कामाचा शुभारंभ
शिर्डी, प्रतिनिधी-महाराष्ट्र राज्य मार्ग परिवहन महामंडळाच्या बससेवेने सर्वसामान्य व गोरगरीब जनतेला नेहमीच आधार दिला असून, ग्रामीण भागातील वाहतुकीचे प्रमुख साधन म्हणून बसची ओळख आहे. राज्य शासनाच्या लोकाभिमुख योजनांमुळे एसटी महामंडळ नव्या उमेदीने प्रगती करीत असल्याचे प्रतिपादन जलसंपदा तथा पालक मंत्री राधाकृष्ण विखे पाटील यांनी केले
महाराष्ट्र राज्य मार्ग परिवहन महामंडळाच्या नाशिक विभागाच्या अंतर्गत लोणी येथील बस स्थानकाच्या पायाभूत सुविधांच्या कामांचा शुभारंभ मंत्री डॉ. राधाकृष्ण विखे पाटील यांच्या उपस्थितीत करण्यात आला.कार्यक्रमाच्या अध्यक्षस्थानी माजी मंत्री अण्णासाहेब म्हस्के पाटील होते. अशोकराव धावणे, बापूसाहेब आहेर, किसनराव विखे, संगमनेर आगार प्रमुख निलेश बटकुळे, लोणी बस स्थानकाचे प्रमुख रावसाहेब पर्वत, आणि ग्रामस्थ उपस्थित होते.या कामास शासनाने बस स्थानकाच्या कामाकरीता सुमारे २कोटी रुपयांचा निधी मंजूर केला आहे.
मंत्री विखे पाटील म्हणाले की, २०१० मध्ये ‘बांधा, वापरा आणि हस्तांतरित करा’ (BOT) तत्त्वावर अहिल्यानगर जिल्ह्यात सर्वप्रथम लोणी येथे आधुनिक बस स्थानकाची उभारणी करण्यात आली. स्व.बाळासाहेब विखे पाटील यांच्या दूरदृष्टीतून बस स्थानकाचे काम करण्यात आले.तत्कालीन परिवहन महामंडळाचे अध्यक्ष स्वर्गीय सुधाकर परिचारक यांच्या मार्गदर्शनाने हा प्रकल्प पूर्णत्वास गेला होता
आज हे बसस्थानक स्वच्छता, सुरक्षितता आणि उत्कृष्ट व्यवस्थापनामुळे राज्यासाठी आदर्श ठरत असल्याचे सांगून मंत्री विखे पाटील म्हणाले की
राज्य शासनाने राबविलेल्या विविध लोककल्याणकारी योजनांमुळे एसटी महामंडळाची आर्थिक व सेवा क्षमता वाढत आहे. कोविड काळात बंद झालेल्या बस फेऱ्यांचा आढावा घेऊन प्रवाशांच्या गरजेनुसार त्या पुन्हा सुरू करण्याबाबत संगमनेर आगाराने पुन्हा नियोजन करावे, बसस्थानक परीसराची पाहणी करून भविष्यात अधिक सुविधा उपलब्ध करून देण्याबाबत आरखडा तयार करण्याच्या सूचना मंत्री विखे पाटील यांनी दिल्या.
माजी मंत्री अण्णासाहेब म्हस्के पाटील यांनी लोणी गावाच्या विकासात बसस्थानकाचा मोलाचा वाटा असल्याचे सांगितले. ग्रामपंचायतीला मिळालेल्या विविध राज्यस्तरीय पुरस्कारांमध्ये बसस्थानकाच्या स्वच्छ व आदर्श व्यवस्थापनाचा मोठा सहभाग राहिला असून, नव्याने होणाऱ्या विकासकामांमुळे बसस्थानक अधिक आकर्षक आणि प्रवासीस्नेही होईल, असा विश्वास त्यांनी व्यक्त केला.
प्रास्ताविकात बसस्थानक प्रमुख रावसाहेब पर्वत यांनी बसस्थानका मार्फत राबविण्यात येणारे विविध उपक्रम व नव्या विकासकामांची माहिती दिली.
